Sali Berisha, dhe gazetarja Klodiana Lala janë përfshirë në një debat para ambienteve të SPAK, pasi kryedemokrati i quajti mediat “narkomedia”, duke argumentuar se 11 nga 12 televizionet po transmetonin drejtpërdrejt kryeministrin Edi Rama dhe po censuronin informacionet për të tjerët.
Pas kësaj deklarate, gazetarja Lala i tha Berishës se gazetarët meritojnë që t’u hiqen mikrofonat kur ata i drejtohen në këtë mënyrë.
Kreu i PD-së sqaroi se kritika e tij nuk ishte ndaj gazetarëve, por ndaj pronarëve të mediave. Gazetarja iu përgjigj duke ironizuar: “Cilët pronarë? Ata që në fakt kanë bashkëjetuar me politikën?”
Debati:
Sali Berisha: Dëgjojeni. Tani po flet dhe kryemashtruesi i kombit. Shikoni diagnozën. Po të doni hapni pak celularët dhe shihni. Nga 12 media, 11 transmetojnë vetëm mashtrimet e tij dhe censurojnë Sali Berishën.
Dhe kjo, dhe ky është e turpit, dhe ky është turpi i atyre mediave të cilët i japin hapësirë totale dhe vendosin blackout, terr, ndaj opozitës. Dhe pastaj, pastaj sapo shuhen, sapo ikën, janë njëlloj, janë të barabartë. Këta janë domethënë… është një problem i madh kjo narkomedia, por përsëri ne në betejën tonë synojmë çlirimin e saj. Ne jemi pro mediave.
Klodiana Lala: Zoti Berisha, kur i drejtohesh medias me narkomedia, si rregull ne duhet të heqim mikrofonat. Në lidhje me atë çfarë…
Sali Berisha: E kam bërë dallimin, edhe po të duash, edhe po të doni, edhe po të…
Klodiana Lala: Atëherë, në lidhje me transmetimin live. Çështja e kryeministrit ka interes kombëtar sepse po flet për Zvërnecin, e para. E dyta, Sali Berisha, të paktën televizionin ku unë punoj, Neës 24, nuk është censuruar asnjëherë dhe ju garantoj që kjo deklaratë e juaja do të jepet tërësisht e plotë. Pra, për ta sqaruar. Megjithatë e dëgjojmë versionin tënd.
Sali Berisha: Tani, tani Klodiana. Mos ngatërro pronarët me gazetarët. E kam theksuar shumë herë dhe u them të gjithë demokratëve, në betejën tonë me mafien e rrezikshme të fjalës së lirë, asnjëherë nuk duhet të konfondojmë pronarët me gazetarët.
Klodiana Lala: Cilët pronarë? Ata të cilët në fakt kanë bashkëjetuar me politikën?
Sali Berisha: Ata të cilët në fakt bëjnë përpjekje, ose kanë marrë tituj, kanë përfituar tendera, kanë përfituar lokale e të tjerë e të tjerë, ose përpiqen, të penduar, të bëjnë gjithçka për t’u përqafuar me qeverinë.
Këta pronarë përfaqësojnë mafien më të rrezikshme të kombit, dhe do të jem përballë tyre në çdo dalje sepse janë gërshërë, janë instrumenta të qeverisë.
Unë falënderoj gazetarët për punën që bëjnë dhe i garantoj se një nga aktet më madhore do të jetë çlirimi i tyre nga pronarët e tyre.
