Një rrjedhje prej më shumë se 2 mijë dokumentesh të brendshme ka zbuluar për herë të parë rolin e fshehtë të Universitetit Teknik Bauman në Moskë në përgatitjen e operativëve të inteligjencës ushtarake ruse (GRU), përfshirë hakerë të lidhur me sulme kibernetike ndaj Perëndimit.
Dokumentet, të siguruara nga një konsorcium ndërkombëtar mediash, tregojnë se brenda universitetit funksionon një strukturë sekrete e njohur si “Departamenti 4” ose “Trajnim Special”, ku studentët përgatiten për operacione të inteligjencës, hakimi dhe luftë informative.
Sipas materialeve të publikuara nga Guardian, Der Spiegel, Le Monde, Insider, Delfi dhe VSquare, studentët trajnohen në përdorimin e viruseve kompjuterike, sulmeve kibernetike, përgjimit elektronik dhe krijimin e fushatave të dezinformimit në rrjetet sociale.
Presidenti rus Vladimir Putin gjatë një vizite në selinë e sapo ndërtuar të GRU-së në Moskë më 8 nëntor 2006.
Dokumentet tregojnë se GRU kontrollon drejtpërdrejt procesin e përzgjedhjes dhe vlerësimit të studentëve, duke dërguar oficerë aktivë për provime dhe caktime në detyrë. Në mesin e pedagogëve përmendet edhe Viktor Netyksho, komandant i njësisë famëkeqe të hakerëve “Fancy Bear”, e akuzuar nga SHBA për ndërhyrje në zgjedhjet presidenciale amerikane të vitit 2016.
Një pjesë e studentëve të diplomuar janë dërguar në njësitë më të njohura të luftës kibernetike ruse, përfshirë grupin “Sandworm”, i akuzuar për sulme ndaj rrjetit energjetik të Ukrainës dhe institucioneve perëndimore.
Hyrja e ndërtesës së shërbimit të inteligjencës ushtarake ruse si seli e Njësisë 26165 të GRU-së
Materialet mësimore përfshijnë gjithashtu propagandë pro-Kremlinit mbi luftën në Ukrainë dhe trajnime mbi manipulimin psikologjik dhe ndikimin informativ.
Ekspertët perëndimorë të sigurisë paralajmërojnë se Rusia po intensifikon operacionet hibride në Evropë, duke kombinuar sulmet kibernetike me sabotimin dhe dezinformimin.
Sipas burimeve të përfshira në hetim, programi në Universitetin Bauman vazhdon ende dhe grupi i fundit i studentëve pritet të diplomohet në vitin 2027.
