Papa Benedikti XVI ndërroi jetë më 31 dhjetor të vitit që sapo lamë pas në moshën 95-vjeçare. Këtë të enjte, Papa Françesku nisi kremtimet e meshës mortore në orën 9.30 në oborrin e kishës së Shën Pjetrit. Në varrimin e Papa Benediktit janë të ftuar vetëm nivelet e larta të qeverisë italiane dhe ato gjermane. Megjithatë, shumë mbretër dhe udhëheqës evropianë do të marrin pjesë në një kapacitet privat, duke përfshirë Mbretëreshën spanjolle Nënë Sofia dhe mbretin e Belgjikës Philippe dhe gruan e tij Mbretëreshën Mathilde.
Në Romë për të nderuar do të udhëtojnë edhe krerët e shteteve të Polonisë, Sllovenisë, Portugalisë dhe Hungarisë, si dhe ministri i Brendshëm francez Gerard Darmanin. Një nga klerikët katolikë të rangut më të lartë të Azisë, kardinali Joseph Zen, thuhet se është lejuar nga autoritetet kineze të marrë pjesë në funeralin. 90-vjeçari u arrestua majin e kaluar për shkeljen e ligjit të sigurisë kombëtare të Kinës në vazhdën e protestave pro-demokracisë në Hong Kong.
Ndonëse Papa Benedikti kishte kërkuar një funeral të thjeshtë, disa aspekte të ceremonisë mortore do të jenë të ngjashme me atë të një pape në fuqi, përfshi këtu edhe varrimin me tre arkivole.
Trupi i Papa Benediktit do të vendoset në një arkivol tradicional prej druri selvi. Një tregim i shkruar i papatit të tij në një cilindër metalik si dhe monedhat e Vatikanit të prera gjatë mbretërimit të tij do të vendosen pranë trupit.
Më pas, do të çohet në sheshin e Shën Pjetrit, ku Papa Françesku do të kryesojë meshën, me lexime në gjermanisht, italisht, arabisht, portugalisht dhe frëngjisht. Në fund të shërbesës, Papa Françesku do të spërkasë arkivolin me ujë të shenjtë dhe do të ndezë temjan.
Pas varrimit, trupi i Benediktit XVI do të kthehet në Bazilikën e Shën Pjetrit për një shërbim privat, ku do të vendoset brenda një arkivol zinku përpara se të futet në një arkivol më të madh prej druri.
Benedikti më pas do të varroset në një varrezë të gjerë nëntokësore ose një kriptë nën bazilikën, e njohur si Grottoes e Vatikanit, e cila strehon varret e disa papëve. Eshtrat e tij do të vendosen në atë që dikur ishte vendi i pushimit të Papës Gjon Pali II përpara se trupi i tij të zhvendosej pasi ai u lumturua në 2011.
Ndërkohë, mijëra njerëz kanë hyrë në sheshin e Shën Pjetrit dhe po presin mbërritjen e arkivolit të Papa Benediktit. Kapaciteti për pjesën kryesore të sheshit thuhet të jetë 60,000, por shumë të tjerë pritet të vijnë në Vatikan për të provuar të gjejnë një pikë të favorshme për të parë Papa Françeskun të udhëheqë meshën për paraardhësin e tij.
