ABC News raportoi se “autoritetet franceze po hetojnë nëse një akt sabotimi shkaktoi daljen nga shinat të një treni – incident që la të lënduar 44 persona në Normandi – pasi në binarë u gjet një pjesë shine”, siç deklaroi policia për agjencinë The Associated Press të shtunën. Treni rajonal po transportonte 186 pasagjerë nga Ruani (Rouen) në Kan (Caen) kur doli nga shinat të premten në mbrëmje në Cléon, në departamentin Seine-Maritime të Francës veriperëndimore. Mes të lënduarve ishte edhe një vajzë 18-vjeçare, e cila u transportua me helikopter në Spitalin Universitar të Ruanit, bëri të ditur policia. Një zëdhënëse e shërbimit të komunikimit të policisë kombëtare franceze, i njohur si SICOP, tha se pjesa e shinës e gjetur në binarë “me shumë gjasa” lidhej me daljen e trenit nga shinat. Ajo foli në kushte anonimiteti, pasi nuk ishte e autorizuar të përmendej publikisht, në përputhje me rregulloren e policisë. Hetuesit po punonin për të përcaktuar nëse rrethanat ishin aksidentale apo nëse bëhej fjalë për sabotim, njoftoi shërbimi. Sipas policisë, prokuroria u tregua e kujdesshme për të nxjerrë përfundime.
