Një ngjarje e rëndë tronditi mbrëmë komunitetin sportiv turk, pasi presidenti i Klubit Sportiv Alemdağ, Tuncay Meriç, humbi jetën nga një sulm me armë zjarri në lagjen Çekmeköy të Stambollit. Sipas raportimeve të mediave turke, incidenti ndodhi rreth orës 21:00 në një restorant të rrugës Tolgahan, në lagjen Güngören. Tuncay Meriç, 49 vjeç, po drekonte kur një person ende i paidentifikuar hyri brenda dhe e qëlloi në kokë me armë zjarri.
Pamjet e kamerave të sigurisë, të publikuara nga mediat lokale, tregojnë momentin e sulmit dhe panikun që shpërtheu mes të pranishmëve, të cilët u larguan me nxitim nga vendngjarja. Meriç u dërgua me urgjencë në spital, por pavarësisht përpjekjeve të mjekëve, ai nuk mundi të mbijetonte.
Hetimet fillestare sugjerojnë se motivi i vrasjes lidhet me çështje borxhi. Ndërkohë, policia e Stambollit ka nisur një hetim të gjerë dhe po shqyrton pamjet filmike për të identifikuar autorin, i cili ndodhet ende në arrati.
Ngjarja ka shkaktuar reagime të shumta dhe ka tronditur botën e sportit turk, ku Tuncay Meriç njihej si një figurë e respektuar dhe e përkushtuar ndaj klubit të tij.
https://twitter.com/siyahsancakx/status/1960993556551590010?t=OcwGxq7wA7L6zSbkvNtJzw&s=19
