Disa kritikë e kanë krahasuar me ironi urdhëresën e fundit të qeverisë për procedurat e ndryshimit të gjinisë me fatvatë e Ajatollahut Ruhollah Khomeini në Iran. Në vitet ’80, Khomeini autorizoi përmes një dekreti fetar ndryshimin e gjinisë, duke e bazuar vendimin në interpretimin e ligjit islamik. Sot, kundërshtarët e urdhëresës në Shqipëri argumentojnë se qeveria po vepron në mënyrë të ngjashme, duke rregulluar një çështje që prek identitetin civil dhe statusin juridik të qytetarëve përmes një akti administrativ, pa një bazë të qartë ligjore të miratuar nga Kuvendi. Sipas kësaj kritike, problemi nuk qëndron te natyra e vendimit, por te burimi i autoritetit: në Iran vendoste Ajatollahu në emër të ligjit fetar, ndërsa në Shqipëri vendos qeveria në emër të popullit. Në të dy rastet, kritikët thonë se publikut i paraqitet një realitet i kryer, ndërsa debati mbi legjitimitetin e vendimit mbetet në plan të dytë. Në këtë këndvështrim satirik, fatvaja është zëvendësuar nga urdhëresa dhe turbanin e ka zëvendësuar vula e ministrisë.
