Prokurorët në Paris kanë thirrur sipërmarrësin miliarder Elon Musk për t’u paraqitur në një intervistë vullnetare në kuadër të një hetimi mbi platformën e mediave sociale X, lidhur me dyshime për përhapje të materialeve të abuzimit seksual me të mitur dhe përmbajtje të rreme.
Sipas prokurorisë franceze, Musk është thirrur së bashku me ish-drejtoreshën ekzekutive Linda Yaccarino, ndërsa hetimi po zhvillohet nga njësia e krimit kibernetik. Ata pritet të japin shpjegime mbi mënyrën si platforma ka menaxhuar përmbajtjet problematike gjatë periudhës kur drejtonin kompaninë.
Hetimi u hap në janar 2025 dhe u thellua pas një kontrolli të kryer në shkurt në zyrat franceze të kompanisë. Autoritetet po shqyrtojnë akuza për bashkëpunim në përhapjen e materialeve pornografike që përfshijnë të mitur, manipulim të sistemeve të automatizuara dhe publikim të përmbajtjeve që mund të përbëjnë shkelje të ligjit francez.
Një rol kyç në zgjerimin e hetimit ka luajtur sistemi i inteligjencës artificiale Grok, i zhvilluar nga kompania xAI dhe i integruar në X. Ky chatbot ka shkaktuar reagime globale pasi gjeneroi imazhe të seksualizuara jo konsensuale dhe publikime që lidhen me mohimin e Holokaustit, një vepër penale në Francë.
Prokurorët po hetojnë gjithashtu nëse përhapja e këtyre përmbajtjeve mund të ketë qenë pjesë e një strategjie për të ndikuar në vlerën e kompanive të lidhura me Musk, përfshirë X dhe xAI, në prag të planeve për listim në bursë.
Ndërkohë, raportime mediatike tregojnë për tensione mes autoriteteve franceze dhe atyre amerikane, me U.S. Department of Justice që thuhet se ka shprehur rezerva ndaj hetimit, duke e konsideruar atë si ndërhyrje në një biznes amerikan dhe në lirinë e shprehjes.
Mbetet ende e paqartë nëse Musk dhe Yaccarino do të paraqiten fizikisht në Francë për t’iu përgjigjur kërkesës së prokurorëve.
