Deputeti i PS-së, Erion Braçe, deklaroi para parlamentit se vetëofrimi për të kandiduar për Bashkinë e Tiranës nuk lidhet me ambicie personale. Duke iu përgjigjur pyetjeve të gazetarëve nëse do të kandidojë, ai tha se “gjërat që thuhen në shtëpi mbeten në shtëpi”.
“Gjërat që thuhen në shtëpi mbeten aty. Nuk bëhet fjalë për ambicie personale. Po të ishte për personale, nuk do të kishte fare vlerë. Unë kam folur brenda Asamblesë së PS-së dhe aty mbetet,” shtoi Braçe.
“Të bëhet proces siç e parashikon statuti i PS. PS duhet të bëjë proces si në çdo bashki të Shqipërisë”, tha Braçe, teksa më tej duke iu referuar zhvillimeve të mëparshme dhe propozimit të Ogerta Manastirliut nga kryeministri Edi Rama sa i përket drejtimit të “shtëpisë” së kryeqytetit, Braçe tha se emri i saj është propozuar në kushte emergjencë. Ai insistoi se statuti i Partisë Socialiste parashikon qartë mënyrën se si duhet të zhvillohet procesi dhe se ky model duhet të respektohet pa përjashtim.
