Tensione dhe akuza të forta kanë shoqëruar mbledhjen e Këshillit Bashkiak në Vlorë, ku në qendër të debatit ishte krijimi i shoqërisë “Vlora Invest”, e cila u miratua me 29 vota pro të këshilltarëve socialistë.
Sipas opozitës, nisma synon tjetërsimin e pronave të Bashkisë dhe lidhet me interesa për ndërtimin e një parku fotovoltaik në Kaninë, por këto akuza u mohuan nga kryebashkiakja Brunilda Mersini.
Nga Gjergji Nika, antar i Këshillit Bashkiak i PD
“Vlora Invest” sh.p.k. është kompani e krijuar nga Bashkia Vlorë dhe e votuar nga këshilltarë që shpesh nuk dinë as çfarë po miratojnë.
Le ta kuptojnë qytetarët si funksionon skema:
Bashkia propozon kalimin e një prone publike tek kompania “Vlora Invest”.
Këshilltarët e maxhorancës e votojnë mekanikisht, si ushtarë partie.
Administratori i kompanisë ia jep pronën për zhvillim një subjekti privat.
Dhe pastaj?
Përgjegjësia politike dhe penale zhduket nga Kryetarja e Bashkisë dhe “delegohen” tek të tretët.
Kjo është tentativa për të krijuar një mur mbrojtës:
Bashkia → Kompania → Privati.
Por qytetarët duhet ta dinë: delegimi administrativ NUK e fshin përgjegjësinë nëse ka dëm ekonomik apo shpërdorim detyre.
Po imitohet modeli i centralizimit dhe shmangies së përgjegjësisë, por fundi i këtyre skemave dihet – përgjegjësia është personale dhe nuk mbulohet me firma zinxhir.
Mesazh për çdo drejtues në bashki që ka të drejtë firme të deleguar:
Mos u bëni mburojë për paligjshmëri.
Mos firmosni vendime që nesër mund t’ju çojnë përpara ligjit.
Përgjegjësia nuk është kolektive kur vjen puna te penale– është individuale.
