Hajdutët shfrytëzuan periudhën e qetë të Krishtlindjeve për t’u futur në kasafortën e një banke gjermane dhe për të vjedhur të paktën 10 milionë euro para dhe sende me vlerë nga kasat e klientëve, njoftoi policia të martën.
Autorët e krimit shpuan një mur të trashë betoni në një degë të bankës Sparkasse në qytetin perëndimor të Gelsenkirchen dhe më pas hynë me forcë në disa mijëra kasaforta dhe vodhën një shumë e cila vlerësohet në miliona euro, tha policia në një deklaratë.
Shumica e dyqaneve dhe bankave mbyllen në Gjermani gjatë periudhës së Krishtlindjeve duke filluar nga mbrëmja e 24 dhjetorit, dhe policia zbuloi vrimën vetëm pasi një alarm zjarri u aktivizua në orët e para të së hënës, më 29 dhjetor.
Dhjetëra klientë të zemëruar u mblodhën përpara bankës të martën duke thirrur me zë të lartë “Na lejoni të hyjmë!”.
“Nuk munda të flija mbrëmë. Nuk po marrim asnjë informacion”, i tha një burrë gazetarit të Welt ndërsa priste jashtë degës, duke shtuar se e kishte përdorur kasafortën për 25 vjet dhe se aty kishte kursimet e tij për pleqëri.
Një tjetër shtoi se e përdorte arkën e tij të depozitës për të ruajtur para dhe bizhuteri për familjen e tij.
Policia tha se dëshmitarët kanë raportuar se kanë parë disa burra të shtunën në mbrëmje duke mbajtur çanta të mëdha në shkallët e një garazhi parkimi ngjitur.
Pati raportime edhe për një Audi RS 6 të zi i cili doli nga garazhi në orët e para të mëngjesit të së hënës, me persona të maskuar brenda. Targa e automjetit ishte ajo e një makine të vjedhur në Hanover, më shumë se 200 kilometra në verilindje të Gelsenkirchen.
