Papa Luani XIV ka lëshuar një apel të fortë drejtuar bashkësisë ndërkombëtare për t’i dhënë fund konfliktit gati dyvjeçar midis Izraelit dhe Hamasit, duke kërkuar një armëpushim të përhershëm, lirimin e të gjithë pengjeve dhe garantimin e ndihmës humanitare për civilët në Gaza.
Në fjalimin e tij javor para besimtarëve në Vatikan, Ati i Shenjtë theksoi: “Edhe një herë bëj një apel të fortë për t’i dhënë fund konfliktit në Tokën e Shenjtë, i cili ka shkaktuar kaq shumë terror, shkatërrim dhe vdekje”.
Papa nuk përmendi drejtpërdrejt Izraelin apo Hamasin, por nënvizoi rëndësinë e respektimit të së drejtës ndërkombëtare humanitare, duke dënuar ndëshkimin kolektiv, përdorimin pa dallim të forcës dhe zhvendosjen e detyruar të popullsisë civile. Ai përsëriti nevojën për një qasje që vendos në qendër mbrojtjen e civilëve dhe paqen e qëndrueshme në rajon.
