Nga Admir Malaj, #ZëriIntegrimit
E dëgjon kudo: Kur ta kem Pushtetin unë (apo ne)! Se tani e ke Pushtetin ti (apo ju)! Erdhi në Pushtet filan Parti dhe fistek Burrë Shteti!
E dëgjon shpesh në vendin tonë, siç e dëgjon shpesh për vende të tjera që akoma NUK janë demokraci të vërteta.
Them kështu sepse NUK dëgjohet ndonjëherë në lajmet për Gjermaninë, Britaninë, Italinë, Francën, jo e jo për SHBA, që filan Parti apo fistek Burrë Shteti të marrë Pushtetin.
Atje thuhet që fituan zgjedhjet, që marrin detyrën e gjëra si këto.
Këtë gjë ma vuri re një miku im që me të drejtë pyeste i revoltuar: Çfarë është kjo mënyrë shprehjeje? Pastaj nëse dikush hipën në pushtet, po të tjerët, ne (dmth) çfarë jemi? Ne i bie të jemi të nënshtruar?!
Kjo mënyrë e gabuar shprehjeje, që qarkullon nga mediat serioze deri te thashethemet e kafesë, duhet të mbarojë!
Sa më shumë të përmendim fjalën Pushtet, aq më shumë Partitë do kujtojnë se e zotërojnë me të vërtetë atë.
Në fakt, Partitë (vetë)krijohen për të mbështetur ato burra dhe gra që kërkojnë të marrin përgjegjësi për detyrën e administrimit të Pushtetit sipas një ideologjie, me vlera dhe parime të njohura nga Shoqëria.
Kujdes, Partitë nuk e zotërojnë Pushtetin! Pasi atë e zotëron e gjithë Shoqëria si e tërë.
Prandaj duhet të fillojë gjithnjë e më shumë presioni nga të gjithë që të flitet gjithnjë e më pak për Pushtet dhe gjithnjë e më shumë për Detyrë.
Në një Demokraci të vërtetë Partitë kanë Detyra ndaj Shoqërisë dhe jo Pushtet mbi të!
Këtë e kemi Ne në dorë (Demokracinë)!