Të paktën 17 persona kanë vdekur dhe 12 të tjerë janë plagosur në një shpërthim në një fabrikë hekuri dhe çeliku pranë qytetit portual të Izmirit në Turqinë perëndimore.
Autoritetet thanë se të gjithë të vrarët dhe të plagosurit ishin punëtorë në uzinën Habas Demir Celik në Aliaga, një nga prodhuesit kryesorë të çelikut në vend. Pamjet nga vendi i ngjarjes treguan një zjarr të madh brenda objektit dhe një kolonë të madhe tymi që ngrihej në ajër.
Aksidentet në vendin e punës mbeten një problem kronik në Turqi, tha Turke Health and Safety Labour Watch, një organizatë e pavarur e shoqërisë civile.
Presidenti Rexhep Tajip Erdogan fillimisht tha se numri i të vdekurve ishte 16, por Ministri i Shëndetësisë, Kemal Memişoğlu, njoftoi më vonë se një nga ata që ishin plagosur rëndë kishte vdekur më vonë, duke e çuar numrin e të vdekurve në 17.
Dëshmitarë okularë në vendngjarje thanë se shpërthimi tronditi tokën, me një person që fillimisht besoi se kishte rënë një tërmet.
Në një deklaratë, kompania që drejton fabrikën tha se aksidenti ndodhi gjatë punimeve të planifikuara të mirëmbajtjes në njërën nga furrat me hark elektrik të uzinës.
Guvernatori i Izmirit, Süleyman Elban, u tha mediave se besohet se disa njerëz janë ende nën rrënoja.
Duke folur pas një mbledhjeje të kabinetit të hënën, Erdogan konfirmoi vdekjet dhe tha se hetimet ishin duke u zhvilluar, ndërsa operacionet e kërkim-shpëtimit vazhduan.
Të paktën pesë persona janë arrestuar, sipas shërbimit turk të BBC News, duke cituar raportet e mediave lokale.
Fabrika Habas ndodhet në lagjen Aliaga të Izmirit, e cila është një port i madh dhe një nga qendrat kryesore të prishjes së anijeve në Turqi.
