Shkrimtari francez Michel Houellebecq thotë se skenat e dhunës dhe plaçkitjeve gjatë protestave apo tubimeve masive në Francë nuk përbëjnë më diçka të pazakontë për publikun francez.
Në një intervistë për median spanjolle “ABC Diario”, Houellebecq është pyetur për dhunën që ka shoqëruar protestat e fundit në Francë dhe për mënyrën se si ajo perceptohet brenda vendit.
Sipas tij, pamjet mund të kenë tronditur opinionin jashtë Francës, por francezët janë mësuar prej vitesh me incidente të tilla.
“Prej vitesh tashmë, sa herë që ka një ngjarje që mbledh shumë njerëz në rrugë, qoftë protestë, festë kombëtare apo finale e ndonjë kampionati futbolli, ka edhe plaçkitje. Pothuajse çdo herë”, shprehet Houellebecq.
Shkrimtari francez thotë se për këtë arsye ngjarjet e fundit nuk i kanë bërë ndonjë përshtypje të veçantë.
“Është e trishtë ta thuash, por në fakt jemi mësuar”, shton ai.
I pyetur se përse dhuna është bërë kaq e zakonshme, Houellebecq e lidh fenomenin me atë që ai e konsideron dështim të sistemit të drejtësisë dhe mungesë frike nga ndëshkimi.
“Mendoj se ka një dështim të drejtësisë. Njerëzit nuk kanë frikë të mjaftueshme nga pasojat”, deklaron shkrimtari.
Sipas tij, arsyet që i shtyjnë disa persona drejt plaçkitjeve nuk janë të vështira për t’u kuptuar, por përhapja e fenomenit lidhet me bindjen se pasojat penale janë gjithnjë e më të pakta.
“Nëse kjo po ndodh gjithnjë e më shpesh, është sepse njerëzit kanë gjithnjë e më pak frikë nga ndëshkimi”, thotë Houellebecq.
Deklaratat e shkrimtarit vijnë në një kohë kur Franca është përballur me protesta të shoqëruara në disa raste me përplasje, dëmtime dhe plaçkitje, duke rikthyer debatin mbi rendin publik, reagimin e policisë dhe mënyrën se si trajtohen autorët e dhunës.
