Sot shënohet një vit nga ndarja nga jeta e Drita Ivanaj, një figurë që mishëroi dijen, integritetin, kujtesën historike dhe përkushtimin e palëkundur ndaj Shqipërisë.
Drita Ivanaj ishte trashëgimtare e një historie të shquar, por mbi të gjitha ishte vazhduese dhe ndërtuese e saj. Me vizion, punë të pareshtur dhe këmbëngulje të rrallë, ajo e ktheu trashëgiminë e familjes Ivanaj në një mision të gjallë, në shërbim të arsimit, kulturës, të rinjve dhe shoqërisë shqiptare.
Fondacioni Ivanaj, i ngritur dhe zhvilluar falë përkushtimit të saj, mbetet sot dëshmia më e prekshme e këtij misioni dhe e lidhjes së saj të pashkëputur me atdheun.
Një vit më pas, mungesa e saj ndihet thellë. Megjithatë, prania e saj vazhdon të jetojë në shtëpinë që riktheu në jetë, në institucionin që ndërtoi, në vlerat që mbrojti pa kompromis dhe në përgjegjësinë që na la për ta çuar përpara veprën e saj.
Sot e kujtojmë me nderim, mirënjohje dhe respekt të thellë.
