Serbia ka pësuar një tjetër pengesë në rrugën e saj drejt anëtarësimit në Bashkimin Evropian, pasi ambasadorët e vendeve anëtare nuk arritën të gjejnë unanimitetin e nevojshëm për hapjen e Grupit 3 të negociatave të pranimit.
Sipas Euronews, tetë nga 27 shtetet anëtare të BE-së kundërshtuan hapjen e grupit të ri të negociatave gjatë mbledhjes së zhvilluar të mërkurën në Bruksel.
Vendet që votuan kundër janë Holanda, Suedia, Finlanda, Belgjika, Estonia, Lituania, Bullgaria dhe Kroacia.
Ndërkohë, Danimarka, Luksemburgu dhe Letonia nuk e kundërshtuan hapur procesin, por shprehën rezerva, ndërsa Franca mbetet një nga mbështetëset kryesore të avancimit të Serbisë në procesin e integrimit evropian.
Presidenti francez Emmanuel Macron ka deklaruar më herët se Bashkimi Evropian ka nevojë për një “Serbi të fortë dhe demokratike” si pjesë të familjes evropiane.
Grupi 3 i negociatave lidhet me konkurrueshmërinë dhe rritjen gjithëpërfshirëse. Për hapjen ose mbylljen e çdo grupi negociues kërkohet miratimi unanim i të 27 shteteve anëtare të BE-së.
Serbia aplikoi për anëtarësim në Bashkimin Evropian në vitin 2009 dhe fitoi statusin e vendit kandidat në vitin 2012.
Deri më tani janë hapur 22 kapituj negociues, ndërsa dy prej tyre janë mbyllur përkohësisht.
Komisioni Evropian u kishte rekomanduar vendeve anëtare hapjen e Grupit 3, duke argumentuar se Serbia ka ndërmarrë hapa të rëndësishëm për adresimin e shqetësimeve të ngritura nga BE-ja.
Sipas dokumentit të Komisionit, Beogradi ka shfuqizuar ndryshimet e debatueshme në ligjet për gjyqësorin, ka bërë përparim në lirinë e medias, kuadrin zgjedhor dhe bashkëpunimin me Bashkimin Evropian në politikën e jashtme dhe të sigurisë.
Megjithatë, Komisioni pranon se nevojiten ende reforma të mëtejshme, veçanërisht në sistemin gjyqësor dhe atë të prokurorisë.
Një nga çështjet kryesore që vazhdon të ngjallë kundërshtime është fakti se Serbia nuk është përafruar me sanksionet e Bashkimit Evropian ndaj Rusisë pas pushtimit të Ukrainës.
Sipas diplomatëve evropianë, shqetësime mbeten edhe për sundimin e ligjit dhe ritmin e reformave demokratike.
Nga ana tjetër, Komisioni Evropian thekson se Serbia ka bashkëpunuar me BE-në për të parandaluar anashkalimin e sanksioneve ndaj Rusisë, ka ofruar mbështetje për Ukrainën dhe ka intensifikuar kontaktet politike me Kievin.
Komisionerja Evropiane për Zgjerimin, Marta Kos, ka ripërsëritur mbështetjen e Komisionit për hapjen e Grupit 3.
“Në dritën e zhvillimeve pozitive të muajve të fundit, Komisioni ka rinovuar rekomandimin e tij që Këshilli të hapë Grupin 3 në negociatat e pranimit me Serbinë. Ne do të vazhdojmë të inkurajojmë reformat që janë në interes të qytetarëve dhe të gjithë shoqërisë serbe”, deklaroi Kos gjatë një debati në Parlamentin Evropian.
