Qeveria e Japonisë ka njoftuar se numri i njerëzve në moshën 100 vjeç e lart është rritur në një rekord prej gati 100 mijë personash.
Duke vendosur një rekord të ri për të 55-tin vit radhazi, numri i njëqindvjeçarëve në Japoni ishte 99 mijë e 763 deri në shtator, tha ministria e shëndetësisë të premten.
Nga ky total, gratë përbënin një përqindje dërrmuese prej 88%.
Japonia ka jetëgjatësinë më të gjatë në botë dhe njihet për faktin se shpesh është shtëpia e personit më të vjetër në botë – megjithëse disa studime kontestojnë numrin aktual të njëqindvjeçarëve në të gjithë botën.
Është gjithashtu një nga shoqëritë që plaken më shpejt, me banorët që shpesh kanë një dietë më të shëndetshme, por një shkallë të ulët lindjeje.
Personi më i vjetër në Japoni është 114-vjeçarja Shigeko Kagawa, një grua nga Yamatokoriyama, një periferi e qytetit Nara. Ndërkohë, burri më i vjetër është Kiyotaka Mizuno, 111 vjeç, nga qyteti bregdetar i Iwatës.
Ministri i shëndetësisë Takamaro Fukoka uroi 87 mijë e 784 femra dhe 11 mijë e 979 meshkuj njëqindvjeçarë për jetëgjatësinë e tyre dhe shprehu “mirënjohjen e tij për kontributet e tyre shumëvjeçare në zhvillimin e shoqërisë”.
Shifrat u publikuan përpara Ditës së të Moshuarve të Japonisë më 15 shtator, një festë kombëtare ku njëqindvjeçarët e rinj marrin një letër urimi dhe një kupë argjendi nga kryeministri.
Këtë vit, 52 mijë e 310 individë ishin të kualifikuar, tha Ministria e Shëndetësisë.
Në vitet 1960, popullsia e Japonisë kishte përqindjen më të ulët të njerëzve mbi 100 vjeç nga çdo vend i G7 – por kjo ka ndryshuar dukshëm në dekadat që nga ajo kohë.
Kur qeveria e saj filloi anketën e njëqindvjeçarëve në vitin 1963, kishte 153 persona të moshës 100 vjeç e lart.
Kjo shifër u rrit në 1 mijë në vitin 1981 dhe qëndroi në 10 mijë deri në vitin 1998.
Jetëgjatësia më e lartë i atribuohet kryesisht më pak vdekjeve nga sëmundjet e zemrës dhe format e zakonshme të kancerit, në veçanti kanceri i gjirit dhe i prostatës.
Japonia ka shkallë të ulët të obezitetit, një faktor kryesor që kontribuon në të dyja sëmundjet, falë dietave me pak mish të kuq dhe shumë peshk dhe perime.
Shkalla e obezitetit është veçanërisht e ulët për gratë, gjë që mund të shpjegojë disi pse gratë japoneze kanë një jetëgjatësi shumë më të lartë se homologët e tyre meshkuj.
Ndërsa sasitë në rritje të sheqerit dhe kripës u futën në dieta në pjesën tjetër të botës, Japonia shkoi në drejtimin tjetër – me mesazhe të shëndetit publik që i bindën me sukses njerëzit të ulin konsumin e kripës.
Por nuk është vetëm dieta. Japonezët kanë tendencë të qëndrojnë aktivë në moshë të shtyrë, duke ecur dhe duke përdorur transportin publik më shumë se të moshuarit në SHBA dhe Evropë.
