Ekonomisti libertarian i krahut të djathtë, Javier Milei, merr sot detyrën si president i Argjentinës, tri javë pasi mundi kandidatin kryesor me premtimin për të ulur shpenzimet sociale dhe për të shfuqizuar bankën qendrore.
53-vjeçari do të bëjë betimin përpara se të mbajë fjalimin e tij inaugurues përpara ndërtesës së Kongresit Kombëtar në Buenos Aires.
Më pas ai do të presë liderë të huaj në Casa Rosada, pallati presidencial dhe selia e qeverisë kombëtare.
Mbreti spanjoll Felipe VI, presidenti kilian Gabriel Boric, kryeministri uruguaian Luis Lacalle Pou, presidenti i Paraguajit Santiago Peña dhe kryeministri hungarez Viktor Orbán kanë njoftuar pjesëmarrjen e tyre.
Ish-presidenti brazilian Jair Bolsonaro dhe lideri i partisë populiste spanjolle të krahut të djathtë Vox, Santiago Abascal, gjithashtu kanë planifikuar të marrin pjesë në ceremoni.
E diela shënon gjithashtu 40 vjetorin e kthimit të demokracisë së Argjentinës pas diktaturës ushtarake.
Milei fitoi balotazhin e zgjedhjeve të 19 nëntorit kundër ish-ministrit të Ekonomisë Sergio Massa.
Gjatë fushatës Milei tha se do të prezantonte dollarin amerikan si kurs ligjor, do të shfuqizonte bankën qendrore dhe shumë ministri dhe do të shkurtonte në mënyrë drastike shpenzimet e qeverisë.
Që atëherë, ai e ka zbutur ndjeshëm retorikën e tij. Ai solli gjithashtu një numër politikanësh me përvojë në kabinetin e tij, të cilët më parë i kishte fyer si anëtarë të “kastës” që ai i përçmonte.
Milei nuk ka shumicën në parlament, duke e lënë atë të varur nga partitë e tjera nëse shpreson të kryejë reforma të mëdha.
