Inspektorët bërthamorë të Kombeve të Bashkuara kanë zbuluar se rreth 2.5 tonë uranium natyror mungon nga zona në Libi që nuk është nën kontrollin e qeverisë.
Drejtori i Agjencisë Ndërkombëtare të Energjisë Atomike (IAEA), Rafael Grossi, u ka thënë shteteve anëtare se inspektorët kanë gjetur se 10 kazanë që përmbanin koncentrat uraniumi “nuk ishin të pranishëm siç ishte deklaruar më parë”, raportoi Guardian.
IAEA-ja do të kryejë aktivitete të tjera për të zbardhur shkaqet për zhdukjen e materialit bërthamor dhe lokacionin e tij.
Uraniumi natyror nuk mund të përdoret menjëherë për prodhimin e energjisë ose bomba, pasi procesi i pasurimit zakonisht kërkon që metali të shndërrohet në gaz që më pas të arrijë nivelet e nevojshme.
Megjithatë, secili ton i uraniumit natyror, nëse merret nga një grup me burime teknologjike, mund të rafinohet deri në 5.6kg material për armë me kalimin e kohës, thonë ekspertët. Kjo e bën të rëndësishme gjetjen e metalit që mungon.
“Të mos diturit e lokacionit të saktë të materialit bërthamor mund të paraqesë rrezik radiologjik, si dhe ngreh shqetësime për sigurinë bërthamore”, tha Grossi.
