Analisti Andi Bushati deklaroi se ish-zyrtari i FBI-së, Charles McGonigal është paguar me 225 mijë dollarë nga politika, pasi ai ka marrë dokumente nga zyra e kryeministrit Edi Rama për të hetuar një parti rivale.
Në emisionin “Now” në Euronews Albania, Bushati u shpreh se kemi të bëjmë me një lobim politik.
“Aty thuhet që njëri nga këta personat, A dhe B, njëri i ka dhënë paratë, tjetri i ka paguar udhëtimet. Të dy këta, u interesokan që ky zyrtar të hetojë një parti kundërshtare të kryeministrit. A ka person privat sot në Shqipëri, që do i prishej terezia, që shko ti, unë po të paguaj që t’i prishësh punë PD-së, LSI-së. Këtë mund ta bëjë vetëm një kundërshtar politik.
Tregon që interesi ka qenë politik dhe ai ka marrë para për politikë. Këtë e përforcon akoma më tepër që, ky korrputuesi i zyrtarit të FBI-së, merrte dokumente nga zyra e kryeministrit, për të ushqyer zyrtarin e FBI-së, kundër një partie rivale. Kjo gjë nuk mund të jetë veçse politike. Çdo mendje logjike mendon që këtu kemi një lobim politik, për të përdorur një zyrtar të korruptuar të FBI-së, për të instrumentalizuar luftën e brendshme politike në Shqipëri”, theksoi ai.
