Agjentët amerikanë të antidrogës kanë zbarkuar në Shqipëri, në kuadër të një operacioni për goditjen e grupit kriminal që dyshohet se është përgjegjës për trafikimin e 1.3 ton kokainë të kapur në fillim të këtij viti në portin e Savonas në Itali.
Mësohet se dy agjentët e DEA-s amerikane janë duke zhvilluar operacione në disa qytete shqiptare, si Tiranë, Durrës, Elbasan dhe Vlorë.
Katër shqiptarë janë tashmë në pranga në Itali lidhur me sasinë e madhe të kokainës që mbërriti në Itali e fshehur në pjesën e poshtme të një anije peshkimi. Agjentët e huaj kanë arritur të përgjojnë komunikimet e grupit të shqiptarëve që është përgjegjës për trafikimin e kokainës, duke arritur të identifikojë disa prej tyre.
Katër shqiptarët e arrestuar në Itali, u kapën teksa qëndronin në një dhomë hoteli, ku edhe kishin fshehur rreth 350 kilogram kokainë. Emri i tyre nuk është bërë i ditur. Anija e mbushur me kokainë u nis nga Brazili në 30 dhjetor të vitit të kaluar.
