Nën hijen e lëvizjeve në PS për gjetjen e një kandidati për Bashkinë Tiranë, ministri Blendi Gonxhja, ka shprehur ambicien e tij për të qenë ai kandidati.
Madje, si për të thënë indirekt se Ervin Demo i përfolur deri më tani si kandidat i mundshëm i socialistëve, nuk e lidh asgjë me Tiranën, Gonxhja tha se ai është mes deputetëve që e njeh mirë kryeqytetin.
“Gjatë gjithë jetës sime nuk ka ndodhur ndonjëherë që të kem deklamuar, folur, lutur, që të kem një projekt personal nuk e bëj dot dhe ta shpalos. Unë jam një prej shumë deputetëve të PS, jo të gjithë e njohin njësoj Tiranën, jo të gjithë kanë sedrën për Tiranën. Si shumë prej atyre që militojnë, punojnë, angazhohen, nuk do të lija gjë pa bërë që të ndihmoja kauzën, projektin. Nëse PS do të kishte një projekt, nuk diskutohet që do të isha këtu për të dhënë kontributin tim. Duhet të jemi shumë të kujdesshëm që kjo mos të tingëllojë si Blendi që kërkon një gjë që nuk e vendos Blendi. Ka shumë rëndësi që të kemi zgjedhje të mira, të kemi zgjidhur këtë problematikë që kemi para nesh dhe që duhet ta kanalizojmë në një energji që t’i japë të mira vendit dhe mos ta dëmtojë Tiranën”, tha Gonxhja gjatë një interviste për Report Tv.
