Shqipëria është përfshirë në një operacion të gjerë ndërkombëtar kundër një rrjeti kriminal që dyshohet se drejtonte një skemë mashtrimi përmes platformave online të investimeve, duke shkaktuar humbje financiare prej më shumë se 4 milionë eurosh. Operacioni, i mbështetur nga Eurojust dhe Europol, ka çuar në arrestimin e shtatë personave dhe mbylljen e mbi 100 serverëve të përdorur për aktivitetet kriminale. Hetimet kanë zbuluar se rrjeti përdorte platforma të rreme tregtimi, përmes të cilave viktimat joshnin të investonin shuma të mëdha parash, me premtimin e fitimeve të shpejta nga kriptomonedhat, valutat e huaja dhe aksionet. Gjatë aksionit u kontrolluan 17 ambiente, përfshirë një qendër telefonatash në Kosovë, ndërsa të arrestuarit pritet të dorëzohen ose të ekstradohen drejt Gjermanisë.
Autoritetet, me mbështetjen e Eurojust-it dhe Europol-it, kanë ndërmarrë një operacion kundër një rrjeti kriminal që drejtonte një skemë mashtrimi përmes investimeve. Operacioni ka çuar në mbylljen e më shumë se 100 serverëve dhe arrestimin e shtatë personave. Ky aksion vjen pas arrestimeve dhe kontrolleve të mëparshme të kryera në vitet 2022 dhe 2025. Skema e mashtrimit përdorte platforma online të tregtimit, të cilat në pamje të parë dukeshin legjitime, për të joshur viktimat që të transferonin shuma të mëdha parash. Humbjet e përllogaritura kalojnë 4 milionë euro.
Në vitin 2022, një çift gjerman paraqiti një kallëzim pasi kishte investuar kursimet e tij përmes një platforme online, por më pas kishte konstatuar se nuk ishte në gjendje të tërhiqte fitimet. Kallëzimi vuri në lëvizje një hetim, i cili zbuloi një skemë ndërkombëtare mashtrimi që kishte në shënjestër viktima në mbarë botën.
Mashtruesit premtonin fitime marramendëse brenda një periudhe të shkurtër, përmes tregtimit të kriptomonedhave, valutave të huaja dhe aksioneve. Pasi transferonin një shumë të vogël parash, viktimave u shfaqeshin fitime të fryra, duke krijuar përshtypjen se platforma ishte legjitime. Më pas, personat që paraqiteshin si ndërmjetës ushtronin presion psikologjik ndaj viktimave, duke i nxitur të investonin shuma edhe më të mëdha parash. Kur viktimat kërkonin të tërhiqnin fitimet, mashtruesit përdornin taktika të ndryshme zvarritjeje për t’i penguar. Në fund, autorët zhdukeshin dhe viktimat kuptonin se paratë e tyre kishin humbur.
Pas më shumë se katër vitesh hetime, një operacion i parë ndërkombëtar i dha goditjen e parë skemës së mashtrimit, duke çuar në dy arrestime dhe sekuestrimin e një sasie të madhe provash. Pas analizimit të këtyre provave, hetuesit identifikuan edhe shtatë të dyshuar të tjerë, mes tyre drejtuesit e qendrave të telefonatave (call center), të cilat përdoreshin për të bindur viktimat të investonin më shumë para. Autoritetet organizuan një operacion tjetër ndërkombëtar, gjatë të cilit arrestuan të dyshuar të tjerë dhe sekuestruan prova materiale dhe para.
Provat e mbledhura gjatë operacionit të dytë çuan në aksionin e sotëm. Analiza zbuloi një kompani me bazë në Qipro dhe Izrael, e cila dyshohet se ofronte shërbime kriminale të gatshme për përdorim (crime-as-a-service), duke furnizuar grupe të ndryshme kriminale me faqe interneti mashtruese, të përdorura për realizimin e skemave të mashtrimit online. Autoritetet identifikuan gjithashtu klientë të dyshuar të kësaj kompanie në Shqipëri, Kosovë* dhe Maqedoninë e Veriut, të cilët dyshohet se administronin qendra telefonatash të përdorura për mashtrime. Operacioni kishte në shënjestër këta persona, si dhe serverët që përdoreshin për aktivitetet e tyre kriminale. Në total, autoritetet kontrolluan 17 ambiente, përfshirë një qendër telefonatash në Kosovë*. U sekuestruan më shumë se 100 serverë, së bashku me prova dhe pasuri të tjera. Shtatë persona u arrestuan me qëllim dorëzimin ose ekstradimin e tyre drejt Gjermanisë.
Bashkëpunimi ndërkombëtar ka qenë thelbësor për shkatërrimin e kësaj skeme mashtrimi, ndërsa Eurojust dhe Europol kanë qenë në qendër të operacionit që prej fillimit. Eurojust mbështeti ekzekutimin e disa Urdhrave Evropianë të Hetimit, Urdhrave Evropianë të Arrestimit dhe urdhrave për ngrirjen e aseteve, si dhe siguroi bashkëpunimin mes vendeve të ndryshme gjatë gjithë hetimit, për shkëmbimin e informacionit, përcaktimin e strategjive dhe planifikimin e veprimeve të përbashkëta. Pranë Eurojust-it u ngritën dy ekipe të përbashkëta hetimore: njëri përfshinte autoritetet gjermane, polake dhe shqiptare, ndërsa tjetri autoritetet shqiptare dhe ato të Kosovës*. Gjatë operacionit të sotëm, Agjencia koordinoi të gjitha veprimet gjyqësore nga selia e saj në Hagë. Europol ofroi analiza të zgjeruara, verifikoi të dhënat kundrejt bazave të tij të të dhënave dhe bashkoi hetuesit kombëtarë për të përgatitur operacionin e përbashkët. Në ditën e aksionit, Europol dërgoi ekspertët e tij në Shqipëri dhe Kosovë* për të mbështetur punën e ekspertizës digjitale dhe për të kryer verifikime të menjëhershme në bazat e të dhënave të agjencisë. Qendra e saj Virtuale e Komandimit mbështeti koordinimin e ndërhyrjes.
Operacioni u zhvillua nga autoritetet e mëposhtme:
Gjermani: Prokuroria pranë Gjykatës Rajonale të Itzehoe-s, Departamenti për Luftën kundër Krimit Kibernetik; Zyra Shtetërore e Hetimit Kriminal të Schleswig-Holstein-it.
Qipro: Policia e Qipros.
Finlandë: Byroja Kombëtare e Hetimit.
Shqipëri: Prokuroria e Posaçme kundër Korrupsionit dhe Krimit të Organizuar (SPAK); Byroja Kombëtare e Hetimit (BKH); Policia e Shtetit.
Izrael: Policia e Izraelit – Njësia Kombëtare për Krimin Kibernetik Lahav 433 dhe Njësia e Ndihmës Ligjore – Drejtoria e Inteligjencës.
Kosovë*: Prokuroria Speciale e Republikës së Kosovës; Policia e Kosovës – Drejtoria për Hetimin e Krimeve Ekonomike dhe Korrupsionit – Sektori i Hetimeve Financiare.
Maqedonia e Veriut: Prokuroria Themelore Publike për Ndjekjen e Krimit të Organizuar dhe Korrupsionit; Ministria e Punëve të Brendshme, Byroja për Siguri Publike – Departamenti për Luftën kundër Krimit të Organizuar dhe të Rëndë.
