Votuesit në Islandë kanë hedhur poshtë propozimin e qeverisë për të rihapur bisedimet e anëtarësimit me Bashkimin Evropian, pas një fushate të ashpër që ka shpërfaqur ndarje të thella në vend, raporton theGuardian.
Kampi i “JO”-së siguroi 52.8% të votave kundrejt 47.2% të kampit të “PO”-së, në një votim ku pjesëmarrja e qytetarëve ishte jashtëzakonisht e lartë, duke arritur në 82.5%.
Fushata u zhvillua në hije të tensioneve gjeopolitike globale dhe deklaratave të Donald Trump për mbrojtjen dhe kontrollin e Arktikut, përfshirë Groenlandën fqinje.
Ndërsa mbështetësit e integrimit argumentuan se anëtarësimi në BE do të ofronte siguri dhe mbrojtje më të madhe, kundërshtarët arritën të fitonin terren duke paralajmëruar se Brukseli do të kërcënonte sovranitetin e vendit, bujqësinë dhe industrinë jetike të peshkimit.
Votimi nxori në pah edhe një ndarje të qartë gjeografike: kryeqyteti Reykjavik ishte e vetmja zonë ku fitoi “PO”-ja, ndërsa zonat rurale votuan masivisht kundër.
Kryeministrja e Islandës, Kristrún Frostadóttir, pranoi verdiktin e sovranit duke deklaruar: “Është mjaft e qartë se kjo çështje nuk do të ecë përpara nën këtë qeveri”.
Ajo shtoi se ekzekutivi do të vlerësojë nëse do të paraqesë një rezolutë parlamentare për të tërhequr zyrtarisht kërkesën për anëtarësim, e cila daton që nga viti 2009.
Nga ana tjetër, reagimi nga Brukseli ishte i heshtur. Presidenti i Këshillit Evropian, António Costa, i përcolli kryeministres islandeze mesazhin se blloku “respekton plotësisht zgjedhjen demokratike” të qytetarëve dhe se Islanda do të mbetet një partner i ngushtë përmes Zonës Ekonomike Evropiane (EEA).
Frostadóttir kishte thënë më parë se do ta braktiste tërësisht çështjen e anëtarësimit në BE për pjesën e mbetur të mandatit të saj nëse votuesit do ta refuzonin propozimin.
Zyrtarët dhe diplomatët në Bruksel kishin parë në Islandë një kandidat me pesë yje që mund t’i kishte provuar skeptikët e zgjerimit se e kishin gabim.
Vendi nordik ishte pothuajse i garantuar të bëhej një nga kandidatët kryesorë, duke pasur parasysh shkallën e gjerë të integrimit me bllokun.
Ndërkaq, liderët euroskeptikë në Evropë, si Marine Le Pen në Francë dhe Nigel Farage në Britani, nxituan të uronin Islandën, duke e cilësuar rezultatin si një fitore të sovranitetit dhe të “Evropës së kombeve të lira”.
