Prokuroria e Posaçme (SPAK) ka reaguar pas raportimeve për kallëzimin e bërë në Itali ndaj ish-kreut të saj, Altin Dumani, duke sqaruar se çështja lidhet me një kërkesë për përjashtimin e tij nga një procedim penal në Shqipëri.
Sipas SPAK, shtetasi Petrit Çela i është drejtuar drejtuesit të Prokurorisë së Posaçme më 20 maj dhe 18 qershor 2026, duke kërkuar përjashtimin e prokurorit Altin Dumani nga procedimi penal nr. 193/2023, ku të pandehur janë Marjus Lulaj dhe Mario Çela, familjarë të tij.
Kërkesa për përjashtim është bazuar te një kallëzim penal i bërë nga Petrit Çela në Prokurorinë e Veronës, Itali, ndaj Dumanit, për veprën penale të “shpifjes” sipas Kodit Penal italian.
SPAK bën me dije se kërkesa për përjashtim është rrëzuar me vendimin e datës 19 qershor 2026, pasi është vlerësuar si e pambështetur në ligj dhe prova.
Sipas njoftimit, Prokuroria e Veronës kishte kërkuar arkivimin e procedimit penal ndaj Dumanit, ndërsa Petrit Çela kishte paraqitur kundërshtim, duke çuar çështjen për shqyrtim pranë Gjykatës së Veronës.
SPAK sqaron gjithashtu se lidhja e vetme e Dumanit me procedimin ndërkombëtar ka qenë nënshkrimi, në cilësinë e drejtuesit të SPAK, i dokumenteve institucionale për krijimin e një Skuadre të Përbashkët Hetimore (JIT) mes autoriteteve shqiptare dhe italiane.
Sipas Prokurorisë së Posaçme, Dumani nuk ka qenë pjesë e grupit hetimor, nuk ka kryer veprime hetimore dhe ka marrë dijeni për procedimin në Itali vetëm në maj 2026, pas kërkesës për arkivim nga autoritetet italiane.
SPAK thekson se nga kronologjia e veprimeve rezulton një lidhje mes kallëzimit në Itali dhe interesit të drejtpërdrejtë familjar të kallëzuesit në procedimin penal nr. 193/2023, ku kërkesa për përjashtimin e prokurorit është mbështetur pikërisht mbi këtë kallëzim.
Njoftimi
Duke marrë shkak nga disa lajme dhe artikuj të publikuar në disa nga mediat vendase, të cilat i referohen burimeve të mediave lokale të Verona-s në Republikën e Italisë, sqarojmë opinionin publik si vijon :
Shtetasi Petrit Çela i është drejtuar Drejtuesit të Prokurorisë së Posaçme, më 20.05.2026 dhe më 18.06.2026, me kërkesë për përjashtimin e prokurorit Altin Dumani nga procedimi penal nr. 193/2023, ku janë të proceduar penalisht të pandehurit Marjus Lulaj dhe Mario Çela (familjarët e shtetasit Petrit Çela), procedim penal në të cilin prokurori Altin Dumani ushtron funksionin e prokurorit të çështjes.
Në mbështetje të kërkesës për përjashtim, shtetasi Petrit Çela ka paraqitur pikërisht faktin e kallëzimit penal të ngritur në Verona, Itali. Drejtuesi i Prokurorisë së Posaçme pasi ka vlerësuar kërkesën e paraqitur dhe aktet ku ajo është mbështetur, me vendimin e datës 19.06.2026 ka vendosur “Mospranimin e kërkesës”, si e pambështetur në ligj dhe në prova.
Nga dokumentacioni i paraqitur nga shtetasi Petrit Çela rezulton se në Prokurorinë e Republikës pranë Gjykatës së Veronës, Itali, është regjistruar procedimi penal nr. R.G.N.R. 3514/2026 – R.G. GIP 2877/2026, për veprën penale të “Shpifjes” (calunnia), të parashikuar nga neni 368 i Kodit Penal italian, mbi bazën e një kallëzimi të paraqitur nga shtetasi Petrit Çela ndaj prokurorit Altin Dumani, i cili ka ushtruar funksionin e Drejtuesit të Prokurorisë së Posaçme kundër Korrupsionit dhe Krimit të Organizuar nga data 19 dhjetor 2022 deri më 19 dhjetor 2025.
Prokuroria e Republikës pranë Gjykatës së Veronës, pas shqyrtimit të akteve, ka paraqitur më datë 21.04.2026 kërkesë për arkivim (richiesta di archiviazione) të procedimit penal, e depozituar më 14.05.2026. Ndaj kësaj kërkese, personi që ka paraqitur kallëzimin penal Petrit Çela ka paraqitur kundërshtim (opposizione) më 11.05.2026, çka ka çuar në caktimin e një seance gjyqësore pranë Seksionit GIP/GUP të Gjykatës së Veronës.
Nga aktet e administruara rezulton se, i vetmi element i identifikuar që lidh prokurorin Altin Dumani me bashkëpunimin ndërkombëtar në fjalë është nënshkrimi, në cilësinë e Drejtuesit të Prokurorisë së Posaçme, i një shkrese institucionale, më datë 11.07.2024, si dhe i një Marrëveshjeje, më datë 26.08.2024, për krijimin e një Skuadre të Përbashkët Hetimore (JIT) mes Prokurorisë së Posaçme dhe Prokurorisë së Republikës pranë Gjykatës së Veronës, nismë e ardhur nga vetë autoritetet italiane në kuadër të procedimit penal nr. 10792/2023.
Prokurori Altin Dumani nuk ka qenë pjesë e grupit hetimor të procedimeve penale nr.10792/2023 (Itali) dhe nr.123/2024 (Prokurori e Posaçme), nuk ka kryer veprime hetimore, marrje në pyetje, sekuestrime apo kërkesë për sekuestrim, si dhe ka marrë dijeni për ekzistencën e procedimit penal në Itali vetëm në muajin maj 2026, pra pas paraqitjes së kërkesës për arkivim nga ana e Prokurorisë italiane.
Nga kronologjia e sipërpërmëndur rezulton lidhja ndërmjet kallëzimit të paraqitur në Itali dhe interesit të drejtpërdrejtë familjar që kallëzuesi Petrit Çela ka në procedimin penal nr.193/2023 të Prokurorisë së Posaçme, si dhe përdorimi i vetë faktit të kallëzimit penal si bazë procedurale për kërkesën e përjashtimit të prokurorit të çështjes.
