Denoncimi i një qytetari për zhdukjen e një vlere prej 500 mijë lekësh nga llogaritë e tij bankare pranë UBA Bank, si dhe një kallëzim i kryer nga vetë banka, çuan në zublimin e një skeme vjedhje nga vetë punonjësit e institucionit financiar privat.
Me kërkesë të Prokurorisë së Tiranës, gjykata respektive ka caktuar 12 masa sigurimi “Arrest në burg”, “Arrest në shtëpi” dhe “Pezullimi i shërbimit të një detyre a shërbimit publik”, për punonjësit e një prej degëve të UBA Bank, të cilët akuzohen për veprat penale “Vjedhja duke shpërdoruar detyrën”, “Falsifikimi i dokumenteve” dhe “Falsifikimi kompjuterik”.
Mes të proceduarve janë edhe drejtori i degës së bankës ku ka ndodhur vjedhja, Albin Keta dhe zëvendësi i tij, Gilbert Hoxha, të dy të arrestuar.
Sipas një njoftimi të shpërndarë nga Prokurorisë e Përgjithshme të mërkurën, nga hetimet është evidentuar se nga llogaritë e klientëve të bankës, janë kryer 30 tërheqje pa mandat, si dhe janë hapur e mbyllur pa autorizim disa depozita me afat në euro dhe dollarë.
Sipas prokurorisë, drejtori Keta dhe zëvendësi i tij, akuzohen se kanë kryer në mënyrë të përsëritur veprime të kundërligjshme gjatë ushtrimit të detyrës së tyre funksionale.
