Presidenti amerikan Donald Trump ka mbërritur në Pekin, ku është pritur me ceremoni madhështore nga autoritetet kineze. Air Force One u ul në kryeqytetin kinez mes masave të forta ceremoniale dhe një organizimi të pazakontë nga Pekini zyrtar.
Sipas mediave amerikane që shoqërojnë delegacionin presidencial, Trump u prit nga zv/presidenti kinez Han Zheng, ndërsa në aeroport ishin të pranishëm edhe ambasadori amerikan David Perdue, ambasadori kinez në Uashington Xie Feng dhe zyrtarë të lartë të diplomacisë kineze.
Në nder të presidentit amerikan u shtrua tapet i kuq, ndërsa ceremonia u shoqërua nga një gardë nderi ushtarake dhe një bandë ceremoniale. Rreth 300 të rinj kinezë valëvitnin njëkohësisht flamuj amerikanë dhe kinezë, ndërsa brohorisnin në kor: “Mirë se erdhe, mirë se erdhe! Një mirëseardhje e ngrohtë!”.
Pas zbritjes nga avioni presidencial, Trump përshëndeti autoritetet kineze dhe ndaloi për disa çaste duke buzëqeshur përballë ceremonisë së organizuar në aeroport.
Presidenti amerikan nuk iu përgjigj pyetjeve të gazetarëve dhe më pas u largua me limuzinë drejt hotelit ku do të qëndrojë gjatë vizitës në Pekin. Në delegacionin që shoqëron Trump ndodheshin edhe djali i tij Eric Trump, nusja Lara Trump, si dhe disa biznesmenë të njohur amerikanë, mes tyre Elon Musk.
Më shumë se një duzinë drejtuesish amerikanë do t’i bashkohen Trump në këtë vizitë, konfirmoi për BBC një zyrtar i Shtëpisë së Bardhë i njohur me planet.
Vizita konsiderohet e rëndësishme për SHBA-në, pasi Trump do të takohet me presidentin Xi Jinping në një moment kur tensionet ekonomike dhe teknologjike mes dy vendeve janë në rritje.
Përfshirja në momentet e fundit e Jensen Huang në delegacion konsiderohet domethënëse, pasi çipat e avancuar të inteligjencës artificiale (AI) të Nvidia janë në qendër të rivalitetit mes SHBA-së dhe Kinës.
Huang është gjithashtu pjesë e Këshillit të Këshilltarëve të Trump për Shkencën dhe Teknologjinë, së bashku me liderë të tjerë biznesi, përfshirë Mark Zuckerberg të Meta dhe Larry Ellison të Oracle.
Përveç Huang, Musk, Cook dhe Fink, pjesë e delegacionit zyrtar amerikan në Kinë janë edhe:
Dina Powell McCormick, presidente dhe zv/presidente e Meta
Kelly Ortberg, presidente dhe drejtuese ekzekutive e Boeing
Ryan McInerney, drejtor ekzekutiv i Visa
Stephen Schwarzman, drejtor ekzekutiv i Blackstone
Brian Sikes, drejtor ekzekutiv dhe kryetar i Cargill
Jane Fraser, drejtuese ekzekutive e Citi
Jim Anderson, drejtor ekzekutiv i Coherent
Henry Lawrence Culp, drejtor ekzekutiv i GE Aerospace
David Solomon, drejtor ekzekutiv i Goldman Sachs
Jacob Thaysen, drejtor ekzekutiv i Illumina
Michael Miebach, president i Mastercard.
