Duket se situata në Partinë Demokratike pas përjashtimeve të disa anëtarëve të saj, ka shkaktuar pakënaqësi në bazë dhe strukturat drejtuese të kësaj partie. Brenda mbledhjes ka qenë edhe deputeti i zonës Arjan Ndoja. Përplasjet me tone të ashpra janë dëgjuar edhe jashtë dyerve të PD.
Bëhet me dije se drejtuesit e Partisë Demokratike Kruje dhe Fushë-Krujë kanë zbarkuar vetë në selinë qendrore të PD në Tiranë, ku kanë ngritur problematikat e tyre, pasi pretendojnë se nuk janë dëgjuar deri tani.
Raportohet se ata kanë shprehur revoltën e tyre në lidhje me veprimeve arbitrare të qendrës së partisë për shkrirjen e degëve, vendim i marrë nga Sekretari i Përgjithshëm Flamur Noka.
Dy krerët e PD-së lokale, janë përplasur ashpër me Nokën, ndërsa mediat bëjnë me dije se situata ka qenë tepër e tensionuar. Është dashur ndërhyrja e kreut të PD Sali Berisha për të qetësuar “gjakrat” mes tyre.
Në fund të takimit, Berisha ka premtuar se do t’i japë një zgjidhje kësaj situate.
