Investitori i teknologjisë, Peter Thiel, ndodhet në Romë për një sërë aktivitetesh të mbajtura në mënyrë diskrete, por kanë në qendër të vëmëndjes “Antikrishtin”.
Sipas një raportimi të medias italiane “La Repubblica”, vizita e Thiel përfshin një meshë të dielën, një darkë private me të ftuar dhe një seminar tre-ditor me dyer të mbyllura.
Qëndrimi i tij në kryeqytetin italian është shoqëruar me shumë rezervë dhe njëfarë sikleti si në qarqet politike ashtu edhe në ato fetare.
Por çfarë është kjo lëvizje për “Antikrishtin”?
Nga PayPal te filozofia politike e Thiel
58-vjeçari Thiel, i lindur në Gjermani, me një pjesë të fëmijërisë në Afrikën e Jugut dhe me shtetësi amerikane dhe neozelandeze, konsiderohet një nga figurat më të fuqishme të Silicon Valley.
Ai ndërtoi pasurinë e tij fillestare duke themeluar PayPal dhe më pas investoi në kompani që sot janë gjigantë të teknologjisë, si Facebook, OpenAI dhe SpaceX e Elon Musk.
Më vonë ai krijoi kompaninë e analizës së të dhënave Palantir Technologies. Përveç biznesit, Thiel është i njohur edhe për idetë e tij filozofike dhe politike, të lidhura shpesh me të djathtën amerikane.
Ai konsiderohet i afërt me zv.presidentin amerikan, J. D. Vance.
Teoria e tij për “Antikrishtin”
Në SHBA, Thiel ka organizuar më parë forume intelektuale mbi konceptin e Antikrishtit. Sipas asaj që ka dalë në publik nga këto diskutime, ai argumenton se “Antikrishti” në kohët moderne nuk është një figurë fetare, por një mekanizëm politik.
Sipas tij, është ai që përdor frikën nga apokalipsi për të imponuar qeverisje globale dhe për të frenuar përparimin teknologjik.
Në këtë kategori, sipas këtij interpretimi, përfshihen edhe paralajmërimet për rreziqet ekzistenciale nga armët bërthamore, armët biologjike apo inteligjenca artificiale, të cilat, sipas tij përdoren për të ngadalësuar zhvillimin teknologjik që njerëzimi mund të ketë nevojë për mbijetesë.
Mesha tradicionale në latinisht
Vizita në Romë filloi me një meshë të mbajtur në kishën San Giovanni Battista dei Fiorentini, e njohur për orientimin tradicionalist.
Ceremonia u zhvillua në latinisht, një rit që disa qarqe tradicionale katolike e konsiderojnë të margjinalizuar në dekadat e fundit. Aktiviteti u organizua nga një fondacion italian relativisht pak i njohur, së bashku me institutin Cluny Institute.
Megjithëse një pjesë e së djathtës italiane shfaq simpati për ish-presidentin amerikan Donald Trump, ardhja e Thiel në Romë është pritur me kujdes.
Intelektuali konservator Francesco Giubilei shkroi në rrjetet sociale se ideja për të marrë “techno-djathtën amerikane” si model për konservatorizmin italian dhe për katolicizmin është një çështje krejt tjetër.
Sipas raportimeve, në takimet private mund të marrin pjesë akademikë dhe disa politikanë pranë Lega, por nuk janë planifikuar takime me kryeministren Giorgia Meloni.
Vizita në Romë interpretohet nga disa si një provokim i drejtpërdrejtë ndaj Papës amerikan Leo XIV, të cilin Thiel e ka quajtur më parë “woke Pope”, duke e akuzuar për korrektësi politike.
Institucione akademike katolike në Romë, përfshirë universitetin papnor Pontifical University of Saint Thomas Aquinas (Angelicum), kanë mohuar publikisht çdo përfshirje në organizimin e eventit.
Inteligjenca artificiale në qendër të debatit
Tensioni ideologjik lidhet edhe me temën e inteligjencës artificiale.
Papa pritet të publikojë enciklikën e tij të parë, e cila sipas raportimeve mund të titullohet “Magnifica Humanitas”, dhe që do të trajtojë rreziqet që teknologjia dhe inteligjenca artificiale mund të paraqesin për njerëzimin, nga humbja e vendeve të punës deri te dehumanizimi i marrëdhënieve shoqërore.
Sipas analizës së La Repubblica, pikërisht kjo qasje për rregullimin e teknologjisë është ajo që për Thiel përfaqëson një formë moderne të “apokalipsit” që ai kritikon
