Gjykata e Posaçme Kundër Korrupsionit dhe Krimit të Organizuar (GJKKO) ka arsyetuar masën e pezullimit nga detyra për zv/kryeministren dhe ministre të Infrastrukturës, Belinda Balluku, duke u bazuar në nenin 242 të Kodit të Procedurës Penale.
Sipas këtij neni, pezullimi mund të vendoset për të ndaluar përkohësisht ushtrimin e një detyre publike, përveç rasteve kur i pandehuri është person i zgjedhur sipas ligjit elektoral, si deputet, kryetar bashkie apo anëtar i këshillit bashkiak.
“Në rastin konkret, për të pandehurën Belinda Balluku, nuk ka ndalim ligjor që në zbatim të nenit 242 të K.Pr.Penale, për të cilën kërkohet masa ndaluese, ajo e pezullimit nga detyra е Zv.Kryeministrit dhe Ministrit të Infrastrukturës dhe Energjisë. Neni 242 i K.Pr.Penale, “Pezullimi i ushtrimit të një detyre a shërbimi publik”, parashikon: “1. Me vendimin që disponon pezullimin e ushtrimit të një detyre a shërbimi publik, gjykata i ndalon përkohësisht të pandehurit, plotësisht ose pjesërisht, veprimtarinë që lidhet me to. 2. Kjo masë nuk zbatohet ndaj personave të zgjedhur sipas ligjit elektoral”, thuhet në vendimin e GJKKO-së.
“Në rastin konkret, vlerësohet më e përshtatshme për mbarëvajtjen e procedimit që të caktohen dy masa sigurimi për të pandehurën Belinda Balluku. Gjykata çmon që të theksojë se, caktimi i këtyre masave të sigurimit personal, nuk e pengojnë të pandehurën Belinda Balluku që të ushtrojë funksionet e saj si deputet i zgjedhur në Kuvendin e Shqipërisë”, thuhet në vendimin e GJKKO-së.
