Rastësisht hasa një video të tij në rrjetet sociale. Ndalova ta shikoj… dhe sinqerisht, ishte hera e parë që rrija gjatë duke ndjekur një personazh, duke parë videot e tij njëra pas tjetrës.
Është Dashnor Balliu nga fshati Funarës i Librazhdit, një njeri që ka ndërmarrë një nga aventurat më të pazakonta që kam parë: rreth botës me dy rrota. Do të udhëtojnë në mbi 200 shtete të botës.
Është nis nga fshati i tij në gusht të vitit 2023. Kanë kaluar mbi dy vite e disa muaj që ai jeton vetëm në udhëtim. Në videon që pashë, ai ndodhej në lindje të kontinentit afrikan, në shtetin e 78 të udhëtimit, në Burundi.
Udhëton i vetëm, shok të ngushtë ka vetëm motorin, të cilit i thërret “zemër” dhe dy arushat që i mban gjithmonë me vete — një lloj simboli i humorit dhe optimizmit të tij. Çdo mbrëmje lidhet në rrjete sociale dhe komunikon me njerëzit që e ndjekin e e mbështesin.
Nga ajo që kam ndjekur, Dashnori më dëshmon një gjë shumë të thjeshtë: ëndrrat nuk kanë nevojë as për luks, as për kushte perfekte — kanë nevojë për guxim.
Me motorin e tij të thjeshtë dhe me një zemër që duket se nuk lodhet kurrë, ai po udhëton i vetëm, por në të vërtetë nuk është kurrë i vetmuar. Çdo vend i ri i jep histori, njerëz dhe sfida që e bëjnë aventurën e tij edhe më të jashtëzakonshme.
Rruga e Dashnorit është një kujtesë: bota hapet për ata që kanë guximin të nisin udhëtimin.
Në një kohë kur shumë prej nesh vetëm ëndërrojnë të udhëtojnë, ai ka zgjedhur ta jetojë këtë ëndërr çdo ditë. Me mjetin e tij të thjeshtë dhe me një forcë të brendshme që nuk ka nevojë për fjalë të mëdha, ai po kalon kufi pas kufiri, duke mbledhur histori që nuk mund t’i gjesh në asnjë libër.
Dhe mbi të gjitha, udhëton pa para, finacimi është ditor, dikush i dërgon ndonjë të hollë për të blerë benzinë, dikush për ushqim apo riparim të motorrit, pra, aventurë e plotë në të gjitha dimensionet.
Çfarë njeriu i jashtëzakonshëm. Pastë fat Dashnori dhe iu realizoftë ëndrra për të hyrë në Guinness, por sidoqoftë, ai ka arritur më shumë se një rekord të tillë.
