.
Aktivistja Evi Kokalari e cila tashmë është kthyer në armike e Sali Berishës, ka kritikuar ashpër këtë të fundit pasi ngushëlloi të afërmit e aktivistit dhe konservatorit amerikan Charlie Kirk i cili u vra gjatë një aktiviteti në SHBA.
Evi Kokalari i kërkon Sali Berishës të mos përdorë emrin e Kirk, ndërsa e akuzon kryedemokratin për hipokrizi dhe veprime që kanë dëmtuar Shqipërinë dhe kauzën konservatore.
Sakaq, Kokalari shprehet se familjes e miqve të Charlie Kirk nuk i duhen ngushëllime nga dikush si Sali Berisha që përfaqëson gjithçka ndaj së cilës Charlie ishte kundër.
Statusi i plotë i Kokalarit
“Rri jashtë kësaj radhe, të lutem, Sali Berisha.
Më beso kur them se familjes dhe miqve të Charlie Kirk nuk u duhen ngushëllime nga dikush që përfaqëson gjithçka ndaj së cilës Charlie ishte kundër.
Ke mbajtur peng konservatorizmin në Shqipëri për 34 vitet e fundit dhe u përpoqe të minoje atë që unë përfaqësoja kur të erdha në ndihmë në vitin 2021, që ishte lëvizja MAGA.
Pate guximin të bësh Shqipërinë anëtare të Konferencës Islamike, duke shpërfillur të parët tanë dhe vlerat e krishtera. Shqipëria do të tërhiqet nga ajo organizatë sapo të bëhem Kryeministër.
Ke nxitur dhunë dhe shkatërrim gjatë katër viteve të fundit, duke vënë shpesh zjarr në Parlamentin e Shqipërisë.
Ke mashtruar republikanët në SHBA për sanksionet që thua se të ka vendosur George Soros. Në të vërtetë, ti ishe ai që e ftove personalisht Soros-in në Shqipëri, dhe sot shumë nga bashkëpunëtorët e tu kryesorë mbështeten prej tij, megjithëse asnjëri prej tyre nuk është zgjedhur nga populli.
Sipas truprojave të tu, u ke urdhëruar të sulmonin makinën e ambasadores amerikane Marisa Lino diku në vitin 1997.
Ti je një hipokrit që duhet të rrish i heshtur dhe të mos përmendësh kurrë emrin e Charlie Kirk. Për njerëz si ti, Charlie Kirk është si një prift që duhet të kryejë një ekzorcizëm.
Individë si ti janë arsyeja pse figura si Charlie Kirk shënjestrohen, dhe ka me dhjetëra tregime në Shqipëri për akte të tilla që i ke kryer, drejtpërdrejt ose tërthorazi. Prandaj, ulu dhe hesht. Pate një shans për shlyerje në vitin 2021, dhe e humbe.
