Të tjera detaje janë bërë publike nga shpërthimi me lëndë plasëse në një banesë në fshatin Gurëz, njësia administrative Fushë Kuqe, Kurbin. Mësohet se në shënjestër ka qenë këngëtari Jozefin Marku.
Sipas Policisë së Shtetit, ngjarja ndodhi rreth orës 04:20, në portën e jashtme të murit rrethues të banesës së shtetases M. D. (alias M. B.) ku ishte hedhur një sasi e vogël lënde plasëse, e dyshuar si artizanale.
Menjëherë pas njoftimit, në vendngjarje mbërritën shërbimet e policisë dhe grupi hetimor. Nga këqyrja paraprake u konstatua se porta ishte dëmtuar lehtë si pasojë e shpërthimit.
Gjatë kontrollit në perimetrin përreth banesës, hetuesit gjetën dhe sekuestruan disa gëzhoja, të cilat sipas policisë janë në dukje të vjetra dhe janë marrë në cilësinë e provës materiale.
