Mcn Tv mëson se me urdhër të SPAK-ut, oficerët e BKH-së kanë ushtruar sot kontrolle në ambientet e “Klajdi Resort”, i ndodhur në Golem të Kavajës. Kontrollet kryhen në kuadër të operacionit për goditjen e organizatës kriminale të trafikimit të lëndëve narkotike, e drejtuar nga Franc Çopja dhe vëllezërit Ervis dhe Ardian Çela.
Po ashtu MCN Tv mëson se gjatë operacionit hetuesit e BKH-së kanë sekuestruar edhe telefonin celular të pronarit të resortit, Orman Kokoshi, si pjesë e provave materiale.
Vetëm tre muaj më parë gjatë fushatës për zgjedhjet e 11 majit kryetarja e Parlamentit Elisa Spiropali do të promovonte hotelin në fjalë përmes një postimi në rrjetet sociale.
“Vizitë në Klajdi Resort & Spa, një investim familjar i Osmanit dhe Klajd Kokoshit që lulëzon me përkushtim, në një zonë ku kërkesa rritet gjithnjë e më shumë”, do të shkruante Spiropali në postim. Ndër të tjera ajo do ta konsideronte biznesin: “Një shembull frymëzues se si puna e ndershme dhe vizioni afatgjatë ndërtojnë më shumë se struktura; ndërtojnë besim, punësim dhe zhvillim për komunitetin”.GJKKO, me kërkesë të SPAK, lëshoi në total 16 urdhër-arreste pas operacionit në qytetet Elbasan, Lushnje, Durrës, Tiranë. Masat e sigurisë janë zbatuar për 10 persona, ndërsa 6 të tjerë janë në kërkim.14 prona janë vendosur në sekuestro, mes të cilave edhe rezorti luksoz “Ajman Park”, ku përfshihen hotele, godina shërbimi, restorant dhe ambiente tregtare, në Xhafzotaj të Durrësit.
