Me dhimbje të thellë dhe trishtim të madh mësojmë lajmin e ndarjes së papritur nga jeta të Baba Hekuran Nikollarit, klerikut të nderuar dhe shërbestarit të përkushtuar të Teqes së Baba Aliut në Alipostivan, në rrethin e Përmetit.
Baba Hekurani ishte një udhëheqës shpirtëror i rrallë, i cili me devotshmëri, përkushtim dhe dashuri për besimin Bektashian, e shndërroi Teqen në Alipostivan në një vatër të vërtetë të besimit dhe paqes shpirtërore. Nën udhëheqjen e tij, kjo Teqe u bë një qendër e rëndësishme pelegrinazhi, ku mijëra besimtarë vinin për të kryer ritet fetare, për të gjetur ngushëllim shpirtëror dhe për të marrë bekimin e tij.
I njohur për urtësinë dhe dashurinë e tij për njerëzit, Baba Hekurani ishte gjithmonë pranë komunitetit, duke ofruar fjalën e tij të mençur dhe dorën e ndihmës për këdo që kishte nevojë. Ai nuk ishte vetëm një udhëheqës fetar, por edhe një njeri i thjeshtë dhe i dashur, i cili gjithmonë përçonte vlera të larta të mirësisë, tolerancës dhe humanizmit.
Humbja e tij lë një boshllëk të madh jo vetëm për familjen dhe të afërmit, por për gjithë komunitetin bektashian dhe për të gjithë ata që patën fatin ta njohin. Kujtimi dhe vepra e tij do të mbeten të paharruara, ndërsa trashëgimia shpirtërore që ai la pas do të vazhdojë të ndriçojë rrugën e besimit dhe të paqes.
U prehtë në paqe shpirti i tij i ndritur!
I përjetshëm qoftë kujtimi i Baba Hekuran Nikollarit!
