Dje u mbajt takimi përmbyllës i fushatës së kandidatëve për kreun e PD. Kryesisht takim me degët e kryeqytetit. Në të u vu re një prezencë e lartë e strukturave zyrtare të Partisë Demokratike. Ajo që vlenë të veçohet për shkak të disa specifikave është Dega 7.
Njësia Administrative Nr.7 është një ndër njësitë më të mëdha në Tiranë, si në shtrirje ashtu dhe në numër popullsie. Ka 78.123 banorë e nga këto 63.740 zgjedhës. Përgjithësisht e orientuar majtas por që në vitin 2005 ka shënuar rekord historik duke nxjerrë deputet nga Partia Demokratike. Madje me sistem mazhoritar në një përballje direkte mes Lulzim Bashës dhe Arben Ahmetajt sot në arrati.
Veçori tjetër e kësaj dege është se kryetar i saj për më shumë se 10 vite është z.Gështenja, bashkëudhëtar i z.Basha përgjatë gjithë periudhës opozitare. Thënë ndryshe, bashkëpërgjegjës apo bashkëpërfitues për çdo rekord negativ apo pozitiv të shënuar nga kjo parti. Sot, pas zhvillimeve të fundit, z.Gështenja është pozicionuar kundër rikthimit të Lulzim Bashës duke u bërë pjesë e 7-shes që mbledh firma dhe konfirmon kuorume imagjinare.
Dje, në takimin përmbyllës, u vu re një prezencë masive e strukturave dhe e anëtarësisë së kësaj. Një demonstrim i mbështetjes së PD zyrtare në linjë me orientimet euro-atlantike duke refuzuar kështu çdo investim, direkt apo indirekt, në shërbim të interesave dhe halleve personale.
Është fakt se ky fenomen shihet edhe në degët e deputetëve tjerë bojkotues. Provë e gjallë se grupimi “Bardhi” ka zero impakt në anëtarësi. Kjo sepse demokratët e kanë bërë me kohë zgjedhjen e tyre dhe se ndarja me Berishën e berishizimin është bërë në mënyrë përfundimtare.
E në mbyllje, rikthimi i Lulzim Bashës ka hapur një kapitull të ri i cili do të reflektohet jo vetëm në flukse të reja, sa i përket burimeve njerëzore, por dhe në mënyrën e të bërit opozitë duke reflektuar një qasje të re dhe jo opozitë fasadë për shkak të kushtëzimeve me natyrë ekonomike.
