Tirana futet në pesë ditët e fundit të përgatitjeve në Ohër, përpara debutimit në Conference League kundër Dinamo Batumi, por duket se tashmë gjithcka është gati. Kundër gjeorgjianëve bardheblutë do të përdorin të gjithë armët që kanë në dispozicion, përfshirë tifozët, për të cilën klubi ka vendosur ta ndryshojë stadiumin, duke e kthyer nga Elbasani që mendohej fillimisht në Arenën Kombëtare.
Për prezantimin në Europë bardheblutë shpresojnë jo vetëm të kenë mbështetjen aq të rëndësishme të tifozëve të tyre, por edhe të arkëtojnënë maksimum, duke parë edhe shpenzimet e mëdha që janë bërë me firmat e lojtarëve të rëndësishëm në merkato. Kështu, ndërsa skuadra është ende në Ohër, klubi ka nxjerrë në shitje biletat për ndeshjen kundër Dinamo Batumi. Nga 500 lekë për sektorët pas portave, tribuna E do të kushtojë 1500 lekë e ajo W 3000 lekë.
Si është e kuptueshme çmimi më i lartë do të jetë ai i tribunës Vip, që arrin në 4000 lekë. Kështu, tifozët bardheblu do të kenë mundësinë të jenë prezent në takimin e 13 korrikut në orën 20.00 për të mbështetur skuadrën e tyre të zemrës në sfidën kundër gjeorgjianëve, me shpresën për të matur pastaj forcat në raundin e dytë kundër Besiktas.
