Një shans i ri për Lulzim Bashën, për të drejtuar sërish Partinë Demokratike, po përkthehet në ide të reja për rrugën që do të ndjekë e djathta për t’u kthyer në alternativë qeverisëse. Rishfaqja e tij në politikë pas 1 viti pauzë, u bë me platformën e ndryshimeve kushtetuese të vettingut të Politikanëve, listave të hapura, kufizim të mandateve të kryeministrit dhe votës së emigrantëve .
Nga njësia 2 ku zhvilloi një takim për fushatën e 29 korrikut, Lulzim Basha artikuloi idenë e një aleance vlerash për forcimin e PD-së, të quajtur “Aleanca Qytetare për Demokracinë”, e cila është një organ i përcaktuar edhe në statutin aktual të PD.
“Sot ne kemi përgjegjësinë të japim një model tjetër në politikbërjen e vendit, që ka në fokus shpresat dhe ëndrrat e njerëzve, jo hallet e pak politikanëve. Aleancë Qytetare për Demokracinë, do të jetë koalicioni ynë për të çliruar ekonominë dhe për të çuar përpara ndryshimet kushtetuese që do të zhbëjnë ato të 2008-ës” tha Lulzim Basha në rrjetet sociale, vendi i vetëm ku ka zgjedhur të shpalosë takimet e tij për fushatën e rikthimit në krye të PD“, shkruan Basha.
Aleanca Qytetare për Demokracinë sipas ndryshimeve të bëra në statutin e PD, në Kuvendin e 18 dhjetorit, është një organizatë partnere që përbëhet nga intelektualë që jo domosdoshmërish duhet të jenë anëtarë partie, por duhet të jenë në të paktën 10% e të posteve drejtuese në parti.
- Kjo organizatë partnere përbëhet nga intelektualë me reputacion profesionalë, që shfaqin interes dhe bashkëndajnë vlera dhe parimet e PD. Anëtarësimi në parti nuk është kusht.
- Kjo aleancë synon të analizojë e të japë mendim kritikë me sugjerime konkrete ndaj politikave, qasjeve e nismave zyrtare të PD, duke e ndihmuar partinë të forcojë dialogun dhe lidhjen me shoqërinë.
- PD garanton përfaqësimin e Aleancës Qytetare për Demokracinë me të paktën 10% të të zgjedhurve me pozicione drejtuese në parti.
