Në shumë bashki, anëtarët e Këshillave të dalë nga partia S-I (Sali-Ilir), kanë bashkuar votat me të majtën për të zgjedhur kryetarët apo nënkryetarët e Këshillave apo emrat për Këshillin e Qarkut.
Sali-Ilir kanë 1 vit që akuzon Partinë Demokratike për tradhëti, pse bashkoi votat për zgjatjen e mandatit të vettingut.
Zgjatja e vettingut ishte kërkesë e ShBA. Mirëpo ata na e paraqitën si provë bindëse se PD-ja është e kapur nga Edi Rama. Sduan tia dinë për ShBA, pasi sipas tyre edhe Amerika vetë është e kapur nga Edi Rama.
Po tani pse i bashkojnë votat nëpër Këshilla? A janë ata të kapur nga Edi Rama?
Unë mbetem i principit politik se për çështje madhore të shtetit, votat bashkohen. Thelbi i republikës është konsensusi i palëve të kundërta për jetë të përbashkët publike dhe institucione të përbashkëta.
Ndërsa këta për 1 vit rresht kanë ndotur dhe qelbur çdo hapsirë komunikimi, duke akuzuar për tradhëti. Këta e kanë paraqitur në parim si tradhëti të padiskutueshme. Këta skanë dashur ta dinë si, pse, qysh e tek janë bashkuar votat. Menjëherë e kanë shpallur si provë të shit-blerjes. Sot, çfarë do na thonë? Si do justifikohen?
Sepse sot ose u duhet të pranojnë principin që për çështje të shtetit votat bashkohen, ose duhet të pranojnë se i ka blerë Edi Rama. Nëse pranojnë se votat edhe bashkohen, do duhet t’i kërkojnë falje PD-së dhe deputetëve të saj se i kanë akuzuar padrejtësisht, duhet t’i kërkojnë falje edhe popullit shqiptar për ndotje të hapsirës së komunikimit.
Ose duhet të pranojnë se i ka blerë Edi Rama!
