Kryebashkiaku i Shkodrës Benet Beci ka marrë zyrtarisht detyrën ditën e sotme. Beci gjatë fjalës së tij para Këshillit Bashkiak, ka falenderuar paraardhësin e tij për detyrën e bërë, ndërkohë që ka shtuar se në këtë bashki do të ketë ndryshime të mëdha. Në fjalën e tij ai premtoi se do të punojë me përkushti për çdo banor të këtij qyteti. Po ashtu Beci tha se besimi që i dhanë qytetarët shkodranë është garanci për sukses.
“Së pari më lejoni t’i uroj të gjithë këshilltarët dhe kryetarin e këshillit bashkiak për detyrën. Unë sot kam kënaqësinë dhe privilegjin e madh të jem zgjedhur nga ju dhe njerëzit që ju përfaqësoni në këtë sallë si qytetar i parë i Shkodrës. Por më besoni që do të doja që në këto vite pune me ju të meritoja titullin punëtori dhe shërbëtori i parë i Shkodrës. Rruga që do të bëjmë bashkë pa diskutim ka vështirësi, por unë tani është koha për t’u përqëndruar te puna, është koha për të nisur një ndryshim të madh, jo thjesht që Shkodra të kapë ritmin dhe kohën e humbur, por që t’i paraprijmë së ardhmes. Ne duhet ta nisim punën të fokusuar në përmirësimin e cilësisë së jetës së çdo shkodrani, në zhvillimin e ekonomisë, në mbrojtjen e mjedisit, në promovimin e hapësirave, ideve dhe nismave. Duhet të punojmë për fëmijët e së nesërmes, për Shkodrën që tejkalon veten dhe u pararend zhvillimeve dhe sfidave.
