Një hetim i gjerë 10-mujor i Drejtorisë greke për Luftimin e Krimit të Organizuar ka goditur një rrjet të fuqishëm kriminal të shtrirë në biznes, polici dhe administratën publike.
Sipas ektathimerini.com, në qendër të skandalit është biznesmeni grek Angelos Giannakopoulos, 59 vjeç, pronar i rrjetit të njohur të furrave të bukës “Horiatiko”.
Giannakopoulos, i njohur me pseudonimet “Babi” ose “Shefi”, u arrestua në Janinë sekondat e fundit teksa udhëtonte drejt Shqipërisë, ku synonte të kërkonte strehim.
Deri më tani, operacioni ka çuar në prangosjen e 59 personave të dyshuar për evazion fiskal të rënduar, pastrim parash dhe mashtrime me prokurimet publike.
Sipas dosjes hetimore, biznesmeni u zgjerua përtej industrisë së brumit, duke marrë nën kontroll klube nate (striptizmi) dhe bare plazhi përmes dhjetëra kompanive, shumë prej të cilave rezultojnë fiktive.
Në Rodos, katër kompani të lidhura me rrjetin kontrollonin 28 plazhe të vlefshme.
Edhe pse i detyroheshin bashkisë dhe kompanisë shtetërore të pronave mbi 850,000 euro, autoritetet lokale i zvarritën masat ndaj tyre duke mos ua ndërprerë kontratat.
Hetimi ka ngritur dyshime të forta mbi zyrtarë policorë në Athinë, Rodos dhe Mykonos, si dhe punonjës të administratës tatimore, të cilët mbronin rrjetin.
Hetimi u kompromentua disa herë nga spiunë të brendshëm. Giannakopoulos mori vesh që në maj se ishte nën përgjim pas një takimi sekret me zyrtarë të lartë të sigurimeve shoqërore (EFKA).
Gjithashtu, vetëm pak orë para bastisjes finale të policisë, rrjeti mori një sinjalizim të dytë. Bashkëpunëtorët e tij nxituan të fshinin të dhënat dixhitale dhe serverat në selinë qendrore në Athinë, por policia ndërhyri në kohë.
Nga përgjimet telefonike kanë dalë në dritë biseda ku anëtarët e rrjetit diskutonin për blerjen e dhuratave të shtrenjta, si parfume dhe kozmetikë të markës Yves Saint Laurent, për zyrtarët shtetërorë që i konsideronin si “fëmijët e tyre të kumbarit”, në këmbim të favoreve dhe mbylljes së syve përpara ligjit
