Presidenti i Turqisë, Recep Tayyip Erdogan, do të zhvillojë këtë të premte një vizitë njëditore pune në Arabinë Saudite, ku pritet të takohet me Princin e Kurorës Mohammed bin Salman dhe kryeministrin e Pakistanit, Shehbaz Sharif.
Sipas Presidencës turke, bisedimet do të përqendrohen në marrëdhëniet dypalëshe dhe zhvillimet rajonale, ndërsa mediat ndërkombëtare raportojnë se në axhendë janë edhe siguria detare, pasojat e konfliktit SHBA-Izrael me Iranin dhe bashkëpunimi në fushën e mbrojtjes.
Raportime jozyrtare sugjerojnë se Turqia, Arabia Saudite dhe Pakistani mund të nënshkruajnë një marrëveshje trepalëshe të mbrojtjes. Megjithatë, asnjë prej tre qeverive nuk e ka konfirmuar zyrtarisht këtë informacion.
