E premtja e 26 qershorit mund të hyjë në histori si dita që ndryshoi industrinë gjermane të automobilëve. Mëngjesi nisi me aksionet e BMW-së në nivelet më të ulëta të pesë viteve pas prerjes së papritur të parashikimeve për fitimet për vitin. Pak më vonë u shfaqën zërat për një reduktim të ardhshëm, drastik, të Volkswagen-it: mbi 100 mijë vende pune më pak dhe katër fabrika për t’u mbyllur në Gjermani.
Më pas erdhi letra e CEO-së së Mercedes-it, Ola Kallenius, drejtuar rreth 90 mijë punonjësve: shtyrja e pagesës së bonuseve të jashtëzakonshme për vitin e ardhshëm dhe rritja e javës së punës nga 35 në 40 orë, me të njëjtën pagë.
Ajo u mbyll me njoftimin e dorëheqjes së papritur të administratorit ekzekutiv të Bosch-it, Stefan Hartung, i cili është autor i një plani për shkurtime kostosh që çoi në rreth 18.500 largime të parakohshme.
Brenda pak orësh u materializua një krizë që po piqej prej vitesh. Në vitin 2019, Volkswagen, Mercedes dhe BMW shisnin 6,9 milionë automjete në Evropë dhe 5,6 milionë në Kinë; ndërsa në vitin 2025 totali ra përkatësisht në 6 milionë dhe 3,9 milionë. Në Shtetet e Bashkuara dorëzimet mbetën afërsisht të qëndrueshme rreth një milioni, por tani kërcënohen nga tarifat e Trump-it. Kështu, sot mungojnë 2,6 milionë shitje në krahasim me pritshmëritë: ekuivalenti i rreth dhjetë fabrikave të mesme dimensioni.
