Shtetet e Bashkuara të Amerikës dhe Irani po i afrohen një marrëveshjeje paraprake që synon t’i japë fund konfliktit të zgjatur prej 68 ditësh në rajonin e Gjirit Persik, raporton Reuters.
Sipas burimeve të cituara, përfshirë një zyrtar pakistanez, palët po punojnë për një memorandum njëfaqësh që do të shërbejë si bazë për ndalimin e luftimeve dhe hapjen e një procesi të ri negociatash.
“Do ta mbyllim këtë shumë shpejt. Po i afrohemi fundit,” është shprehur burimi i cituar.
Raportimet e mediave ndërkombëtare, përfshirë Axios, sugjerojnë se Shtëpia e Bardhë beson se marrëveshja është në fazë përfundimtare, ndërsa priten përgjigjet e Teheranit për disa pika kyçe brenda 48 orëve.
Sipas draftit të raportuar, marrëveshja mund të përfshijë një moratorium mbi aktivitetin e pasurimit bërthamor nga ana e Iranit, heqjen graduale të sanksioneve amerikane dhe lirimin e fondeve të ngrira iraniane. Po ashtu, parashikohet lehtësimi i kufizimeve mbi lundrimin në Ngushtica e Hormuzit.
Memorandumi prej 14 pikash, sipas burimeve, po negociohet nga i dërguari amerikan Steve Witkoff dhe Jared Kushner, në bashkëpunim me përfaqësues iranianë, përmes kanaleve direkte dhe ndërmjetësuese.
Plani parashikon një periudhë tranzitore 30-ditore, gjatë së cilës do të hiqen gradualisht kufizimet detare dhe do të vlerësohet zbatimi i marrëveshjes. Në rast dështimi të negociatave, Shtetet e Bashkuara mund të rikthejnë masat ushtarake ose bllokadat detare, sipas burimeve.
Më herët, presidenti amerikan Donald Trump kishte njoftuar pezullimin e një misioni detar në rajon, i cili synonte sigurimin e lundrimit në zonën e ngushticës, por që nuk kishte sjellë normalizim të situatës.
Negociatat vijojnë në një moment tensionesh të larta, ndërsa zhvillimet mbeten ende të paqarta dhe të varura nga reagimi i palëve
