Kryeministri Edi Rama është përballur me pyetje të drejtpërdrejta dhe kritike mbi korrupsionin dhe pastrimin e parave në Shqipëri gjatë një interviste për revistën franceze Le Point.
Gazetarja Anne Nivat i parashtroi Ramës shqetësimet që, sipas saj, ndajnë edhe zyrtarët e Bashkimit Europian, duke theksuar se Shqipëria nuk po bën mjaftueshëm për të luftuar korrupsionin dhe pastrimin e parave.
Ajo ngriti veçanërisht çështjen e Porti i Durrësit, duke e cilësuar si një qendër të rëndësishme të pastrimit të parave në vend.
“Zyrtarët evropianë besojnë se vendi juaj nuk po bën mjaftueshëm për të luftuar pastrimin e parave dhe korrupsionin. Porti i Durrësit konsiderohet një qendër e madhe e pastrimit të parave në ajër të hapur. Cili është reagimi juaj për këtë?”, ishte pyetja e gazetares.
Në përgjigjen e tij, Rama i hodhi poshtë këto pretendime, duke i cilësuar si të pabazuara dhe pjesë e një narrative të gabuar.
“Ky lloj pretendimi i pabazuar, i paraqitur si i vërtetë, është sëmundja e botës sonë. Durrësi është qyteti i dytë më i madh në vend, por porti i tij nuk është një operacion i madh pastrimi parash në ajër të hapur”, u shpreh ai.
Kryeministri shtoi se problematika të ngjashme ekzistojnë edhe në qytete të mëdha europiane, duke përmendur Marseille, Rotterdam, Antwerp dhe Barcelona, si shembuj të porteve që përballen me sfida të ngjashme.
