Shekuj të traditës politike britanike po marrin fund, pasi Parlamenti i Mbretërisë së Bashkuar ka votuar për të larguar aristokratët me tituj të trashëguar nga House of Lords, dhoma e sipërme e parlamentit britanik, njofton washingtonpost.
Vendimi do të rrëzojë dhjetëra dukë, kontë dhe vikontë që kanë mbajtur vende në parlament vetëm falë titujve të trashëguar familjarë.
Ligjvënësit miratuan një projektligj që i jep fund praktikës shekullore që u lejonte fisnikëve të trashëguar të uleshin dhe të votonin në dhomën e sipërme të parlamentit. Reforma është pjesë e planit të qeverisë së kryeministrit Keir Starmer për modernizimin e sistemit politik britanik dhe për ta bërë atë më demokratik.
Ky vendim pritet të hyjë në fuqi pasi ligji të marrë miratimin formal nga King Charles III, çka do të shënojë fundin e një tradite më shumë se 700-vjeçare në parlamentin britanik.
Në të kaluarën, qindra aristokratë kishin të drejtë të uleshin në House of Lords vetëm sepse kishin trashëguar titujt e tyre familjarë. Në vitin 1999, qeveria e atëhershme e kryeministrit Tony Blair e ndryshoi sistemin dhe largoi shumicën e tyre, por lejoi që 92 fisnikë të mbeteshin përkohësisht si kompromis politik.
Projektligji i ri e heq edhe këtë përjashtim të fundit, duke bërë që asnjë person të mos mund të jetë anëtar i parlamentit vetëm për shkak të një titulli të trashëguar.
Aktualisht dhoma e sipërme ka rreth 800 anëtarë, shumica prej tyre të emëruar përjetë (life peers), si dhe disa peshkopë të Kishës së Anglisë.
Edhe pse House of Lords luan një rol të rëndësishëm në shqyrtimin dhe amendimin e ligjeve, vendimi përfundimtar për legjislacionin mbetet në duart e dhomës së zgjedhur.
Mbështetësit e reformës argumentojnë se është e papranueshme që në një demokraci moderne njerëzit të kenë rol në hartimin e ligjeve vetëm për shkak të lindjes së tyre në familje aristokrate.
Nga ana tjetër, disa prej fisnikëve që do të humbasin vendet e tyre kanë shprehur keqardhje për vendimin, duke thënë se aristokracia ka kontribuar për shekuj në debatet dhe traditën parlamentare britanike.
Reforma konsiderohet si një nga ndryshimet më të mëdha në parlamentin britanik në më shumë se një çerek shekulli dhe mund të jetë vetëm hapi i parë drejt një transformimi më të gjerë të dhomës së sipërme të parlamentit.
