Përplasjet mes presidentit Donald Trump dhe ish-presidentit Barack Obama njohin një fazë tjetër.
Shefi i Shtëpisë së Bardhë kritikoi përsëri paraardhësin e tij për zbulimin e informacionit të klasifikuar, pas deklaratës që bëri për alienët.
Një deklaratë e bërë nga Barack Obama disa ditë më parë në lidhje me alienët dhe nëse ata ekzistojnë apo jo “është skandaloze”, sipas Trump.
Gazetarët që shoqëronin Trumpin në ‘Air Force 1’, e pyetën presidentin amerikan nëse ai kishte parë edhe prova të “vizitorëve jo-njerëzorë në Tokë”.
“Ai dha informacione të klasifikuara, nuk duhej ta kishte bërë këtë”, tha Trump, pa e përmendur paraardhësin e tij me emër.
“Pra, a ekzistojnë alienë?” këmbënguli gazetari, të cilit Trump iu përgjigj:
“Nuk e di nëse janë të vërtetë apo jo, por ai bëri një gabim të madh.”
Deklarata e Obamës
Deklarata kontroverse e Barack Obamës u bë në një podcast kur u pyet nëse alienët janë të vërtetë.
“A janë alienët të vërtetë?” e pyeti Brian Tyler Cohen Barack Obamën, të cilës ish-presidenti amerikan iu përgjigj:
“Ata janë të vërtetë, por unë nuk i kam parë”.
Sikur për t’i hedhur edhe më shumë benzinë zjarrit, Obama shtoi shpejt:
“Nuk po i fshehim në Zonën 51. Nuk ka asnjë strukturë nëntokësore përveçse nëse ka një komplot të madh dhe ata po e fshehin atë nga presidenti i Shteteve të Bashkuara.”
“Dhe cila ishte pyetja e parë që bëtë kur u bëtë president?” iu bë pyetja Barack Obamës, dhe ai u përgjigj duke qeshur:
“Ku janë alienët?”
Raportet e detyruan ish-presidentin të lëshonte një deklaratë sqaruese nëpërmjet Instagram-it, në të cilën shkroi se:
“Po përpiqesha të ruaja frymën e ‘raundit të shpejtë’ të pyetjeve dhe përgjigjeve, por meqenëse ka tërhequr vëmendjen, më lejoni të sqaroj.
Statistikisht, universi është aq i gjerë sa shanset për të pasur jetë atje jashtë janë të larta. Por distancat midis sistemeve diellore janë aq të mëdha sa shanset që alienët të na vizitojnë janë të ulëta, dhe nuk kam parë asnjë provë gjatë presidencës sime që alienët të na kenë kontaktuar. E vërtetë!
