Autoritetet greke dhe franceze po hetojnë dyshimet për spiunazh kinez që synon teknologjinë, të dhënat satelitore dhe sekretet ushtarake të NATO-s, duke rritur frikën për rrjete më të gjera spiunazhi.
Autoritetet greke dhe franceze arrestuan spiunë të dyshuar në operacione të ndrysme këtë javë, ku të dyja rastet përfshinin transmetim të dyshuar të të dhënave të klasifikuara ushtarake në Kinë.
Autoritetet ushtarake greke arrestuan të enjten një kolonel nën dyshimin se i kishte dhënë Kinës informacione të klasifikuara dhe tepër sekrete, sipas Shtabit të Përgjithshëm të Mbrojtjes Kombëtare.
Oficeri u arrestua brenda kampit ushtarak ku ishte i stacionuar. Sipas hetuesve, ai dyshohet se kishte qasje në informacion në lidhje me teknologjitë e reja të Forcave të Armatosura në zhvillim e sipër dhe po dërgonte informacion të klasifikuar elektronikisht nga brenda njësisë së tij.
Autoritetet greke thanë se ka indikacione se oficeri u përpoq të rekrutonte të tjerë në një rrjet inteligjence.
Ministria greke e Mbrojtjes tha se kishte “indikacione të qarta për kryerjen e veprave penale sipas Kodit Penal Ushtarak”, konkretisht “mbledhjen dhe transmetimin e informacionit sekret me rëndësi ushtarake te palët e treta, me rrezikun e shkaktimit të dëmtimit të interesave kombëtare”.
Oficeri, i cili komandon një batalion trajnimi të përqendruar në telekomunikacion dhe sisteme elektronike, ishte i stacionuar në një njësi të Forcave Ajrore në Kavouri dhe kishte qasje në informacione të klasifikuara nga degë të shumta të ushtrisë greke dhe vendeve aleate, sipas raportimeve të medias greke.
Gazeta greke Kathimerini raportoi se oficeri dyshohet se transferoi informacione tepër sekrete duke përdorur një program të posaçëm të klasifikuar. Autoritetet gjetën një “makinë të posaçme me program” që dyshohet se është furnizuar nga autoritetet kineze për të fotografuar dokumente të klasifikuara dhe për t’ua dërguar ato marrësve.
Mediat greke raportuan se oficeri rrëfeu pas arrestimit të tij, duke përshkruar rekrutimin nga një zyrtar kinez, ndoshta në një konferencë jashtë vendit, dhe pranoi dërgimin e informacionit kundrejt pagesës.
Çështja filloi të zbulohej rreth dy muaj më parë kur CIA informoi Shërbimin Kombëtar të Inteligjencës të Greqisë se një anëtar i Forcave të Armatosura Greke po i jepte Kinës informacione të ndjeshme në lidhje me çështjet e NATO-s, sipas kathimerini.gr.
Pjesa më e madhe e materialit dyshohet se lidhet me projektet e NATO-s, të cilat kanë tërhequr interesin e aleatëve të NATO-s, veçanërisht Shteteve të Bashkuara.
Frika nga spiunazhi satelitor në Francë
Në Francë, autoritetet ngritën akuza ndaj katër personave, përfshirë dy shtetas kinezë, për përgjim të dyshuar të të dhënave të ndjeshme ushtarake, raportoi të enjten Agjencia Franceze e Shtypit.
Të katër personat u arrestuan gjatë fundjavës në Gironde jugperëndimore, ku dy të dyshuarit kinezë dyshohet se kishin marrë me qira apartamente Airbnb si pjesë e një plani për të mbledhur informacione, përfshirë inteligjencën ushtarake.
Çështja filloi kur banorët panë instalimin e një antene satelitore me diametër rreth dy metra më 30 janar, gjë që përkoi me një ndërprerje lokale të internetit.
Një hetim të nesërmen identifikoi një “sistem kompjuterësh të lidhur me antena satelitore” që lejonte regjistrimin e të dhënave satelitore. Autoritetet besojnë se instalimi mund të ketë kapur “shkëmbimet midis subjekteve ushtarake”, raportoi AFP.
Sipas raportimeve, dy shtetasit kinezë udhëtuan për në Francë me qëllim mbledhjen e të dhënave nga sistemi i internetit satelitor Starlink dhe “entitete të tjera jetësore” dhe transmetimin e tyre në Kinë.
Hetimi francez përqendrohet në “dorëzimin e informacionit një fuqie të huaj” që mund të dëmtojë interesat kryesore kombëtare, një vepër penale e dënueshme deri në 15 vjet burg.
