Në një intervistë për emisionin “This Week” të ABC News, Gjenerali David Petraeus tha se nuk ishte optimist për perspektivat e një takimi midis Putinit dhe Presidentit ukrainas Volodymyr Zelensky — për të cilin Presidenti Trump ka këmbëngulur — dhe tha se nuk sheh arsye për të besuar se një takim i tillë do të rezultonte i suksesshëm, edhe nëse do të materializohej.
Ish-drejtori i CIA-s vuri në dukje se territori shtesë ukrainas që Putini dëshiron “është shumë i fortifikuar dhe forcat ruse do të duhet të luftojnë për vite me radhë me ritmin që po shkojnë” për ta pushtuar atë.
“Ai dëshiron ta zhvendosë Presidentin Zelensky, ta zëvendësojë atë me një figurë pro-ruse dhe, sinqerisht, të demilitarizojë Ukrainën”, tha Petraeus, “asnjëra prej të cilave nuk mund të jetë e pranueshme as për Ukrainën, as për vendet evropiane dhe Shtetet e Bashkuara”.
“Në fakt, sipas Kushtetutës së Ukrainës, Presidenti Zelensky nuk ka as autoritetin të deklarojë se një territor i caktuar do të kontrollohet nga rusët. Kjo do të duhej të shkonte në një referendum kombëtar”, vazhdoi Petraeus.
Petraeus e bëri të qartë se Putini mbetet pengesa për paqen dhe u kërkoi aleatëve të SHBA-së dhe Ukrainës të shtyjnë përpara negociatat duke rritur ndihmën për Ukrainën.
“Mendoj se duhet të jetë e qartë: Pengesa për paqen në këtë moment është Presidenti Putin,” tha Petraeus.
“Dhe ajo që duhet të bëjmë është të ndryshojmë këto dinamika duke e ndihmuar Ukrainën shumë më tepër sesa kemi bërë deri më tani: duke hequr kufizimet ndaj tyre, duke sekuestruar 300 miliardë dollarë rezerva të ngrira në vendet evropiane të parave ruse, duke ia dhënë ato Ukrainës, duke vendosur më shumë sanksione ndaj Rusisë, duke përfshirë edhe Gazprombank dhe duke e kufizuar eksportin e naftës më tej sesa kemi bërë tashmë.”
