26-vjeçari Klajdi Mustaj, punonjësi i policisë i cili ka bërë të mundur nxjerrjen e të plagosurve nga automjeti pas aksidentit të djeshëm në Qafë Koshovicë, ka rrëfyer momentet e ngjarjes ndaj te cilave ishte i detyruar të tregohej gjakftohtë.
Në një intervistë për Euronews Albania ai tha se shpëtimi i të plagosurve ishte një veprim i natyrshëm për të, edhe pse situata ishte shumë e rrezikshme. Ndërkaq, ai shpreh shqetësimin ndaj fëmijës që ndodhej në atë aksident, pasi aktualisht paraqitet në gjendje kritike.
“Sapo kisha përfunduar shërbimin dhe po kthehesha për në shtëpi kur papritur pashë makinën që po rrotullisej disa herë derisa u përplas në pemë. Pashë makinën të shpërthente në flakë dhe menjëherë, aty kam pasur një fikëse zjarri në makinën time dhe kam shkuar për të fikur flakët. Kam nxjerrë fëmijën të parin nga makina, aty u riaktivizua flaka në mjet. Pastaj kam marrë personat e tjerë dhe i kam nxjerrë poshtë. Jam i emocionuar që kur pashë fëmijën në atë gjendje. Kam njoftuar menjëherë sallën e komandimit të Fierit dhe ka ardhur menjëherë zjarrfikësja dhe autoambulanca në vendngjarje.
Ne jemi të trajnuar në punën që bëjmë dhe kemi qetësinë e duhur edhe pse ndonjëherë të rrëmben situata, por kjo mendoj që është më shumë një dhunti. Gjendja ime është shumë mirë nuk kam probleme, përveç disa djegieve të lehta por i lumtur që shpëtova të lënduarit”, tha polici 26-vjeçar.
Mes të tjerash Mustaj shtoi se vlerësimi i bërë nga Drejtori i Përgjithshëm, Ilir Proda ishte një dhuratë dhe shtysë për të treguar akoma më shumë profesionalizëm qoftë nën uniformën e policit por dhe jashtë saj.
“Ndihem shumë i vlerësuar prej çdokujt. Por ajo që do më bënte të ndihesha më mirë është që fëmija të shërohej pasi kam mësuar se ndodhet në gjendje kome”, tha ai
